Апрельданул 21-нний Вихьуллал шяраву хъуннасса уттарашиву дия. Ва кьини чIаххувсса Ссухъиящиял шяраваллил вакилтал бувкIун бия Ххувшаврил ттугълил копия ва Аьпалул лу Вихьуллал шяраваллийн тапшур буван.

ХIажимурад ХIусайнов
Дяъвилия зана къавхьуминнан дацIан дурсса гьайкалданул хьхьичI дуван ччай бивкIсса батIаву, гъарал ларчIун дуну, культуралул къатлуву дурна. СахIна чIюлу бувну бия, лархъун дия дяъвилия зана хьуминнал суратру дусса ва вайннал чIаравра зана къавхьуминнал цIарду чирчу­сса хъуннасса баннер. Мунил ялтту бивхьуну бия чагъардая бувсса кIяласса кьурукьру. Компьютерданул кумаграйну, чIирай ккаккан дуллай бия дяъвилун хас дурсса суратру, дяъвилия зана хьусса чиваркIуннал суратру, зана къавхьуминнал цIарду. Итабакьлай бия Ххувшаврин хас бувсса балайрду, Ватан дуруччин оьвтIисса, ватандалухсса ччаву чантI учин дуллалисса дяъвилул балайрду. СахIналул ца мурцIний лавхъун бия Абадсса цIарал къувтIи. Мунил махъ бивхьуну бия Ххувшаврил ттугълил копия ва саллатIнал тIакьа.
Дайдирхьуна тяхъашивуртту. СахIналул ца чулух бавцIуна, аьрали янналул рангирал лаххиярдаву, Вихьуллал оьрчIал багъирал мюрщулт. Вайннал каруннахь бия мюрщисса ттугъру ва дяъвилия зана хьуминнал суратру дирхьусса мюрщисса ултти. СахIналул гамур чулух бавцIуна Ссухъиящиял шяравасса дуклаки оьрчIру ва учительтал. Ххувшаврил ттугълищал сахIналул дянив увккун, Ккуллал райондалул Ветерантурал советрал председатель Загьидиев Аьбдуллул баян бувна байран дайдихьлахьишиву ва кутIану бувсуна шяраваллавух нанисса эстафеталия, мунил агьаммур мурадрая.
Махъру лавхъуна Ккуллал райондалул бакIчинал хъиривми Хизри Мутаевлул, Сабрина Илиясовал, КIулшиву дулаврил управлениялул бакIчи Албина ХIаммакуевал, Ссухъиящиял школалул директор Асият НикIаевал.
Хъамаллуравух бия райондалул Соцзащиталул бакIчи Жамбулат Гъазиев, райондалул «ЧаннацIуку» кказитрал редактор АбрикI Къянчиев, райондалул Селхозуправлениялул ва тIабиаьт дуруччаврил отделданул бакIчи Рустам Рамазанов.
Ссухъиящиял шяраваллил оьрчIал бувккуна дяъвилун хас бувсса шеърирду. Вихьуллал шярава дяъвилийн лавгминная, ца-ца къатлува кIи-кIия, шан-шама, мукь-мукьа адамина лавгсса кулпатру кIицI буллай, гьарта-гьарзану бувсуна Вихьуллал школалул учитель МутIаллиев МутIаллил. Дяъвилийн лавгминнал цIарду чирчусса лу­ттирдайн бувну, Вихьуллал шярава дяъвилийн лавгун ур 181 адамина. Миннава зана хьуну ур 65 адамина. Амма ва сияхIравун багьну бакъар Вихьуллал шярава бувксса, цайми районнай, шагьрурдай яхъанай бивкIсса, дяъвилийн лавгсса арамтал. МутIаллиев МутIаллил кIицI бувуна, цинявппагу 200-нния ливчусса арамтал дяъвилийн лавгун бивкIшиву, миннава зана хьушиву дахьа 80 адамина. Ва ихтилат буллай унува, экрандалий ккаккан дуллай бия дяъвилия зана хьуминнал суратру. Хъинну ххуйну шеърирду бувккуна Вихьуллал школалул оьрчIал, оьрчIал багърал хъунмур ХIусайнова Залиххал ва ванил канилусса мюрщи оьрчIал.
Ахирданий Ссухъиящиял шяраваллил вакилтурал Ххувшаврил ттугъ ва Аьпалул лу тапшур бувна Вихьуллал жяматрайн.
Хъамаллуран тIивтIуну бия дуки-хIачIиялул ссупра.