ГьунчIукьатIрал шяравалугу, миккусса агьлугу ччяния­цIакула, ца лакран бакъа, лагма-ялттуминнангу эбратрансса агьлу бивкIссар. Уттигу буссар. ЦIанакул чIявуми гьунчIукьатIи, цала маэшатрал хъирив лавгун, шагьрурдай, гила-тихавай ялапар хъанай бур.

Миннан цала буттал шяравалу тачIав хъамакъаритайссар. Бутта­хъал дурмур — мизитру, ламурду, зийлурду, школалул къатри, ххуллурду ва цайми-цаймигу язи­сса затру, ядуллалимигу хъанахъи­ссар шагьрурдайсса гьунчIукьатIи. Мукунминнаву чIявусса бур цала маэшатрайну хьусса кашилуцIух буттал шяраваллил диц-куц ххуй дан­сса давуртту дуллалисса. Мукунминнаясса цану хъанай ур Аьду­хъал СилахIуттиннул ва ХIа­жимирзахъал Тамарил арс Ма­хIаммад. Институтру къуртал бувну махъ МахIаммад ва ванал кулпат Изумрут зий бия Дарбантлив: МахIаммад – шампанское дувайсса заводрай хъунама технологну, Изумрут – коньяк дувай­сса заводрал хъунмур лаборантну.
ГьунчIукьатIрал шяраваллил ккуран сакин дурния шинай МахIаммад мудангу, буттал шяраву дуллалимунил чIарав авцIуну, ччарчан арцуйну, ччарчан маслихIатрайну, кумаг буллалисса инсан ур. Ваналгу, Илиясова Марияннулгу кумаграйну шяраваллил клубрал магъи цIу дурссия. МахIаммадлул машан лавсун 400 том совет ва чил хIукуматирттал чичултрал луттирдал, клубран, библиотекалун пишкаш бувна. Цала ссурахъу Аьду­хъал МахIаммадлущал буттал буттахъал зийлу цIу буккан бувунни. Хъун мизит ва ЧIиви мизит бакьин бувайни, арцуйну кумаг бувунни, мукунма Мемориалданун кумаг бувунни. Цала къатрал хьхьичIсса аьрщарай ванал бувгьуна 30 ахъулссаннул хIави, гай тагу-тавтуна. Лявкъунни шяраву кьадарсса тайпагу, гайгу, гайннуцIун дяъвилий ливтIуминнал мемориалданучIасса хIавигу був­ккун, экьибичинсса.
МахIаммадлул гьарца шинах майрал 9-нний ГьунчIукьатIрал циняв ветерантал барча бувайссар. Ххувшаврил 50 шин хьусса чIумал, мунал ацIния ххюягу ветераннан ГьунчIукьатIрал шяраваллил суратгу дусса шампанскийлул чатварду дуллуна.
Ванал хIатталлил лагмасса чапар дуван цимиллагу арцу дуллу­ссар, кIивун гъаттара къабухлан. МахIаммадлул 2008 шинал дур­сса Хъурдуккаврил байрангу ххишала дакъа дакIний личIансса хьуна. «Аьрщи ва агьлу» тIисса передачалуву уттигу ккаккан дувай га байран.
МахIаммад ххишала акъа инсаншиву дусса, узданну къуццу тIисса, цалва пиша лавайну кIулсса пишакар ур. Ва хъанай ур «Заслуженный работник промышленности РД». Аьбдуллаев МахIаммад лайкь хьуссар «Буттал аьрщарахсса ччаврихлу» тIисса наградалунгу.
Хъунмасса хIаллай ца кIанай захIмат буллай, хьхьичIунсса кка­ккияртту ларсун тIий ва оьрмулул 75 шин шаврицIунгу бавхIуну ванан машина пишкаш бувну бур Дарбантуллал шампанский дайсса завод­рал. Ванал дурсса шампанскийлул чил хIукуматирттайгу хьхьичIунсса кIанттурду бувгьуссар.
ХIурмат бусса МахIаммад, ви­н 100 шинайсса оьрму булуннав, бюхълай личIаннав.
Мудан вил хIурмат бусса ГьунчIукьатIрал ккуран