Январь зурул 13-нний «Замана» кказитрал редакциялий хьунни миллатирттал СМИ-рдал масъаларттан хас бувсса ккуркки стол.

Андриана Аьбдуллаева
Мажлис тIитIлай, «Замана» кказитрал хъунама редактор Арсен Юсуповлул барча бунни даврил уртакьтал Аьрасатнал печатьрал кьинилущал. Хъирив ванал бувсунни хIакьинусса кьини миллатирттал мазурдийсса республикалул кказитру, миннувух цува каялувшиву дуллалисса «Замана» кказитгу (даргиял), цукунсса захIматшивурттащал хьунабакьлай буссарив. Арсен ГъазимахIаммадовичлул бусласимунийн бувну, миллатирттал кказитирттал хъунмур масъала бур ми буккултрачIан чIумуй къабиллалаву. Мунийн бувну, кказит чичлачими махъаллил хъанай бур, ккази тирттал тираж дагьлай дур.
Вайва масъаларттая ихтилат бунни ДР-лул БакIчинал маслихIатчи Азнаур Аджиевлулгу.
— ХIакьину жагьилминнал миллатрал мазурдийсса кказитру ккалай бакъар. Журналистурал бихьлахьи­сса захIмат чIалай му зат къащи хъанан бикIай. Миллатирттал мазурдиву чIявусса лугъатру бушиврулгу цин лархьхьусса захIматшивуртту дуллай дур. Миллатирттал мазурдийсса СМИ чялишну бакъар социал сетирдаву. Даргиял, яруссаннал кказитру личIаннин, вайми цавагу кказитрал уттинин царагу видеоролик дуккан дурну дакъар, къассуссукьусса бюджет бунугу, — увкунни Азнаур Аджиевлул. Ванал пикрилий, миллатрал изданиярттал вирдакIну хьун аьркинну бур театрду. Школалийгу, театрданувугу бакъа, чуври яла инсаннаща мазрая, культуралия, аьдатирттая кIул хьун бюхъайсса.
Заседаниялий гьуртту хъанахъиминнал бувсунни кIанттул телеканаллай передачартту миллатирттал мазурдий дакъашиврия­сса цала рязибакъашивуртту. Мунил хIакъираву «Дагестан» РГВК-лул миллатирттал мазурдийсса телепрограммардал директор Исамудин АхIмадовлул бувчIин бунни цIубутIуй телеканал миллатирттал мазурдийсса передачар­тту дуллан тIиртIуну диркIшиву, амма яла му личIи-личIисса ТВ-пакетирттавун дагьаншиврул оьрус мазрайн бувкIшиву.
Ахирданий Азнаур Аджиевлул кIицI лавгуни, захIматшивурттах къабурувгун ниттил мазурдил тагьар ххуй дансса чаран лякъин аьркиншиву, кIункIу бан аьркиншиву, цала миллатгу, мазгу, культурагу ххирасса спонсортал, энтузиастал, мукунна жяматийсса организациярду, чаран ляхълан аьркиншиву бу­ккултран кказит ххира хьун бансса.
— Циванни жула мазурдий гъалгъа тIисса игрушкартту итакъадакьин, соцсетирдаву акциярду къабуллан. Миллатрал изданияртту халкьуннал аьдатру, фольклор, дакIнихсса халкьуннал творчество дуручлачисса информациялул ва культуралул центрдуну хьун аьркинссар, — увкунни Азнаур Аджиевлул.
ДР-лул Миллатирттал политикалул министерствалул информациялул ва лингвистикалул экспертизалул отделданул хъунмур Лейла ХIажимусиловал бувсунни 2016 шинал Миллатрал политикалул министерствалул «Дагъусттаннал халкьуннал оьрчIал кIанттухсса балайрду» тIисса проектраха зий 36 балай цачIун бувшиву, ва давривухгу, районнал администрациярттал зузалт бакъа­сса, энтузиасталгу хIала бувхшиву.
Лейла ХIажимусиловал бусласимунийн бувну, 2016 шинал Миллатрал политикалул министерствалул республикалул кказитирттал электрон версияртту ххал дурну, чIяруми сайтру хъунмасса хIаллай цIудуккан къадурну душиву аьч хьуну бур. Му бакъассагу, сайтирдай буллусса информация тасса буссарив чIалай бакъар, му бивщусса чIун ккаккан дурну дакъа.
— Миллатирттал кказитирттай­сса материаллу ччясса мутталий ва ххуйну сайтирдай дуккан дулларча, дазул кьатIувсса ва Аьрасатнал регионнайсса дагъусттанлувтуран республикалийсса тагьардания, шикку хъанахъисса иширттая ччяни баян­ссия, микку бивщумур Дагъусттаннал диаспорардал хIасул бувсса ни­ттил маз лахьхьайсса алхIат кьинисса школардай, мукунмасса клубирттаву ишла буллан хьунссия, — увкунни Л. ХIажимусиловал.
Миллатирттал мазурдий буклакисса кказитру ябансса чаран ля­къаврия ихтилатру бунни Дагъусттаннал университетрал периодикалул печатьрал кафедралул заведующий ХIамид МахIаммадовлул, «ЧIава лачин» журналданул редактор, шаэр Аминат Аьбдулманаповал.