Ца-кIира шинал хьхьичI на ттула даврил иширай лавгссияв 1944-ку шинал дизан дурсса Тукъатуллал шяравалу диркIсса кIанайн.

КIикку, цала пирмагу дурну, ятту-гъаттара ябуллай, яхъа­най бия ца кулпат. Ттул махIаттал шавугу ци хьуна учирча, Тукъатуллал баргъбу­ккавал чулийсса муруллул ца ххинчу дия, къатта-къушлива дурксса ххиличIлурду дичлай, лап исрап дурну. КIа ххинчулух архния урувгсса чIумал, тIабиаьтрал чурххай хьусса щавукунна чIалай дия.
Вана укун, ду-дунийн ххи­личI­­лурду дичлай, чапалшивуртту хIасул дуллай буру жува. ТIайлар, ва замана цуппагу мунинма куну хIасул хьусса кунма­сса бур.

Явара, ва ца жула зун­ттавусса шяраваллал инсантурая дайдихьлахьисса даву да­къар. Ва дур хIакьину гьарцара кIанттайсса тагьар «цIуцIи кIану». Буссарив ва иширан лякъинсса чаран? Гьай-гьай, бикIан аьркинни. Ва иширал ялув хъинну кьянкьану бацIан аьркинни. Сакин дан аьркинни ччюрк датIлай, яла хасъсса полигондалийн дичлансса тагьар. Му даву тIурча хIакьину, так ца Ваччиял шяраву дакъа, яла чувчIав дакъар.
Ялагу, инсантурал хасият муксса биччибакъасса хьуну дурхха, гай ххиличIлурду бур ччи-ччинин дичлай, цирдагу ххуллурдал чIаравра.

Вихьуллал шярава Ваччав биянинсса ххуллул лахъишиврий хьунадакьлай дур ряхра нех-ратI. Вана вай неххардил ялттусса ламурдал чуллахун бур кIюрххил даврийн нанисса машинартту шардату­сса ххиличIлурдал пакетру бичлай. Гай пакетру, кув щинал лавсун, кувгу гиккува чарттахун бахчуну личIлай бур.
Ва иширая уссияв на МахIач­къалалия Лаккуйн нанийни ххуллий ттула гьалмахчунащал ихтилат буллай. Ганал увкусса зат ттун ххуй бивзуна. «Машина гьавалий къабачайсса бухьувкун, га ччимур чIумал бензин бутIин зап­равкалийн най бурхха. Мунияту валлагь хъинну хьунссия заправкардал чIарав гай ххиличIлурду дичлансса контейнерду биширча. Яла гичча хасъсса машинар­ттал ласаванссия», — куна. Нанияра Ккуллал райондалия байбишиннуча ва даву дуллай.