[dropcap]М[/dropcap]ахъра-махъсса занг цума-цагу школа къуртал буллалиманал оьрмулуву личIи-личIисса асарду кьабитайсса, оьрмулуву цал шайсса иш бур. Аьдатравун багьну, махъсса шиннардий жу чара бакъа Новостройрайсса школарттайн лагару му байран кIицI лаган. ХIарачат бару цавагу школа лях гьан къабитан.
Имара Саидова
КIулсса зат бур Новостройрайсса школарттал агьалинан цIусса миналий кIанттул хъанахъаврицIун дархIусса захIматшивурттугу чIярусса душиву. Ми захIматшивурттавагу буклай, оьрчIан ххуйсса тарбиягу, цIакьсса кIулшивурттугу дулун хIарачатрай зий бур Чапаевкаллал школалул учительтурал коллектив.
Ва школалий каялувшиву дуллай ур даврил опыт бусса АхIмадов Камил Аьлил арс. Гьашину 11-мур класс къуртал буллай ур 7 оьрчI, 9 класс къуртал буллай ур 44 оьрчI. Райондалул школарттал дянив ва школа хьхьичIсса ххуттайгу бур.
ХьхьичIунсса хIасиллащал школа къуртал бунни МахIаммадова Аьйшатлул, Маммаев Сайдул, МахIаммадов Шамиллул, Шамсуттинова ПатIиматлул ва Асбаров Шамсуттиннул.
Махъва-махъсса гюнгутIул байран лахъа-хъун дан ва оьрчIахь ххуллухъин учин Чапаевкаллал школалийн бувкIун бия администрациялул бакIчинал хъиривчу Марис МахIаммадов, ДЮСШ-рал директор Сергей Аьлимов, «Солнышко» садикрал хъунмур Оксана Исмяилова, учительтал-ветерантал.
ОьрчIру барча бувну махъ директорнал дуллунни грамотартту дуккавриву, спортраву ва жяматийсса иширттаву ххуйсса ккаккияртту чIалачIи дурсса оьрчIан.
Школа къуртал буллалисса оьрчIал дуллунни кIулшивурттал кIула ацIулчинмур классрал оьрчIахьхьун.
Ахирданий, цинявппагу гъан хъанай, выпускниктурал гьухърай тIайлабацIуртту чIа тIисса чичрурдугу дуллай, дакIний личIансса суратругу ришлай бия.
