[dropcap]М[/dropcap]ахъсса шиннардий щаллара дунияллий сийлувун дагьунни велосипедирттайсса соревнованияртту. Масалдаран, Франциянаву гьар шинах дувай велогонки, тур де Франс учай.

ПатIимат Рамазанова
Авгъуст зурул 10-нний лак­рал жагьилтал велосипедир­ттай МахIачкъалалия Шахьував аьрххилий бувккун бур. ЦIан-чаннаву, ссят мукьуннийх зузисса чIумал, ххуллийн бувккун, хъирив кьини хьхьуниву Шахьував бивну бур. Аьмну ххуллийх 22 ссят хьуну дур. Жагьилтурал кьюкьлуву циняв Шахьуватусса бакъар, бур ШавкIратусса, 1-мур ЦIувкIратусса.

Мукьа инсан Шахьуватусса хъанай ур. Хъиндайдихьу Шахьуйннал вирттавралли дурсса учирчагу, тIайлар. Вайнна жагьилтурал цIарду: Маммаев Юнус, Гъазиев МахIаммад, Аьлиев Аьбдулла, Кьурбанов МухIаммад, МахIаммадов Ислам, ХIасан (ванал фамилия кIул дуван къархьунни). Маммаев Юнуслул ппу МахIаммад Шахьуватусса ур, нину – Анжела 1-мур ЦIувкIратусса.

Юнуслул бувсунни цанма ва кьини тIабиаьтрал чулуха тIайлабацIу къавхьушиву, баргъ няй- няй тIий кIири був­сса кьини диркIшиву, ххишалдаран, бигьлан бахчилачисса марчгу бивкIшиву. «КIюрххил, баргъ буккан бувасса чIумал жу гъирарай най бивкIру, личIисса марчгу бакъая, баргъ кIири ­бу­л­­­лан бикIайхту, марчгу гужлан хъа­нан бивкIуна, жунгу ххуллу битан жапану бия. Гьай- гьай, къабигьая бакIлавайсса хху­ллу, тик бивкIсса, зунххисса кIанттурду чIявуя, амма зун­ттал дулантту мютIи дуван ччисса гъирарал жувун мурад бартбигьинсса зуву рутлай дия. Нанинийн бияйхту дакIру дигьаларгуна»- тIий ур Маммаев Юнус.
Барча зул велотур, лакрал вирттал! ЦIуллушиву дулуннав, цIу- цIусса дулантту велосипедирттай мютIи дуллансса кабакьу хьуннав!

Суратирттай:
Лакрал жагьилтал
МахIачкъалалия Шахьував най