ТIабиаьтрал ляличIисса кIан­ттай хIасул хьусса бур Му­кьархъиял махIла, гьава марцI­сса, уртту-тIутIал авадан­сса, щин дарувсса. Дурвав ялагу чувчIав азаллий цава щаращул щин хIала дурхсса нех? ХIайп, заманалул захIматшивуртту сававну ххялтIа бувккун бур цуппа махIла.

Зулайхат Тахакьаева
Амма, чIяруми щархъаву кунма, шиккугу аьдатравун дагьну дур шяраваллил кьини даву. Му кьини гьар кIани-кIанттава бучIай буттал шяравун дунияллийх кIама бивщусса агьлу.
КIира нюжмардул хьхьичI ва неххацI кIицI ларгссия Уриннал кьини. Ларгсса нюжмаркьини вава кIанттай лахъа-хъунну кIицI ларгунни Мукьардалмур кьинигу.
Ва базилух му Кьини цала цIу-ччатIуй узданну лархъунни Мукьардал шяраватусса Рамазанов Юсуп ХIажидавудлул арснал кулпатрал.
— Кьурван-байрандалул хьхьичI­сса гьантри бухьувкун, жу хIукму барду байрандалул харжлугъ жула ужагърая дан, — тIий бур Юсуплул кулпат Зулайхат.

Байрандалийнгу, так ца Мукьардал жяматрайн бакъасса, вайннал оьвкуну бия щала махIлалийн дагьлагьисса щархъал агьулданийнгу: Уриннал, Ккурхъиял, КIамахъаллал ва Ппалассуннал.
Юсуп тамансса шиннардий зий уссия Лакрал райондалул администрациялул бакIчинал хъиривчуну, цIана ур маслихIатчину. Зулайхат зий буссар почталий.
Кьини дайдирхьуна, жямат кIюрххил хIатталлийн лавгун, цала мачча-гъанцириннал рухIирдая алхIам буккаврия. Муния махъ чиваркI бавтIуна мизитравун нюжмарчаклийн. Дурккуна мавлуд. Ахттая махъ байрандалул мажлис тIивтIуна неххацI.

Махъру лахълай бия щала махIлалулгу, махIлалия бувксса хьхьичIунсса инсантуралгу савлугърая, мукьрагу-ххюрагу шяраваллил агьулданул, ттинин кунма, вания тихунмайгу дусшиврул ва цашиврул ламурду буруччин­сса ниятрай.
Жагьилтурал ва оьрчIал дянив хьуна спортрал бяс-ччаллугу.

Шадлугъ чIюлу дан оьвкуну бия хъинну бюхханну бутта­хъал балайрду учайсса ХIажиаьли ХIажиаьлиевлуйн ва Халисат Батирбековайн.
Гьанттайннай клубраву дуруна жагьилтурансса тяхъашивугу. Шадлугъру, буттал кIанттуяту мякь къаливхнура, кунная кув щакъаливхнура къуртал хьурчагу, ялунчIилгу хьунабакьинсса умуд­рай, личIи хьуна цинявппа.