Шадлугъирттай гьуртту хьунни ДР-лул БакIчи Рамазан АьбдуллатIипов, ДР-лул ХIукуматрал Председатель Аьбдуссамад ХIамидов, ДР-лул Халкьуннал Мажлисрал Председательнал 1-ма хъиривчу Юрий Левицкий, министерстварттал ва ведомствар­ттал каялувчитал, шагьрурдал ва районнал бакIчитал.
ДакIнийн бутанну, 1921 шинал январьданул 20-нний ВЦИК-рал кьамул дурссия Да­гъусттаннал АССР сакин даврил хIакъиравусса Декрет.
Шадлугърал митинграй хъунмур ихтилат бунни Юрий Левицкийл. «1920 шинал ноябрьданул 13-нний Щурагь тIивтIуссар Дагъусттаннал халкьуннал Чрезвычайный съезд, тикку РСФСР-данул миллатирттал иширттал нарком Иосиф Сталиннул баян бувссар Совет ХIукуматрал ният душиву Дагъусттаннал миллатирттахьхьун автономиялул ихтиярду дулун. Тания махъ Да­гъусттаннал халкьуннал тарихраву байбивхьуссар цIусса, буниялагу паччахIлугърал цачIуншиву сакин даврил замана. ХIакьинусса кьини личIи-личIисса пикри-зикрирду буслай бур ва кьимат бишлай бур лавгмур заманалун. Жунма хъамабитан къабучIиссар, цукунсса кIану бугьлай буссарив Дагъус_ттаннай автономия сакин даврил жулва халкьуннал оьрмулуву. Дагъусттаннай ччаннай дацIан дурну диркIссар имам Шамиллул заманнай диркIсса кунна­сса паччахIлугъ.
1921 шинал декабрьданул байбихьулий хьуссар Дагъусттаннал Советирттал учреждительный съезд. КIа Съездрал хъинчулий ккарккун диркIссар Да­гъусттаннал Ревкомрал давуртту ва кьамул бувссар ДАССР-данул 1-мур Конституция. Съездрай бувчIуну бивкIссар Дагъус­ттаннал Советирттал Центральный Исполнительный Комитет. Дагъусттаннал миллатру цачIун хьуссар щаллусса паччахIлугъну хъанахъисса республикалувун. Аьрасатнаву паччахIлугъ сакин даву хьуссар ДАССР экономикалувугу, культуралувугу лябу­ккаврил гьануну.
Аьрасатнал кумаграйну жулва миллатирттаща кутIасса чIумуву бювхъуссар ччаннай дацIан дуван граждан дяъвилуву пасат хьуну диркIсса шяраваллил хозяйство, къабигьа­сса ххуллу битан индустриализациялийн ва коллективизациялийн. Га диркIссар Дагъусттаннал Халкьуннал экономика гьаз дурсса ва захIматрал гьунарду ккаккан бувсса чIун. Та чIумал буллай бивкIссар цIусса завод­ру ва фабрикартту, цIусса кьай-кьуйлул щаллу буллай бивкIссар хьхьичIва бувну бивкIми предприятияртту, мукунна таман_сса дахханашивуртту хъанай диркIссар шяраваллавугу. Та чIумал хьхьичIуннай хъанай диркIссар дуккаву ва элму, культура ва магьирлугъ. Юбилейрал кьини жува уттигу цал дакIнийн бичлай буру бюхттулсса оьруснал миллат ва жулва билаятрал цаймигу миллатру», — увкунни Юрий Левицкийл.
Юрий Левицкийл мукунма бувсунни тай шиннардий жулва миллатирттал аралуву цукун­сса кIану бугьлай бивкIссарив оьрус мазрал.
Ганалва бувсунни жулва тарихраву 90-ку шиннардий хьу­сса дахханашивурттая, хаснува СССР пасат хьуну махъсса иширттая.
Официалсса бутIа къуртал хьуну махъ, ккаккан дунни Да­гъусттаннал творчествалул коллективирттал ва ансамбллал концерт.