КIялажавжрал (имбирь) настойка – хьхьичIазаманнул тибетнал рецепт:
— Ласайссар 250 гр. кIяла­жавжрал мархлул, шювшуну, марцI бувну махъ, лисри дурну кьукьайссар. Хъундакъасса банкалувун дирчуну, ялун, банка дуцIинцIа, аьракьи дутIайссар, кьалакьигу ларкьуну, дишайссар цIансса, кьавкьсса кIанай 2 нюжмардийсса, чIун-чIумуй хъюлчу-кIутIугу дуллай. Диргьуну махъ, дишайссар миннуву 2 чяйлул къуса ницIал.

КIялажавжрал настойкалул инсаннайн хIал бучIан бай­ссар, тонус гьаз дайссар, хъинну хъинссар ангиналун, аьвкъу-гъили хьуманан, яруннил чаннан. Гьантлун кIийлла дукра дукан хьхьичI ца-ца чяйлул къуса хIачIайссар. Ва даруврал оь марцI байссар, инсан гьарца азардая урувччуну итайссар.

Ва даруврал холестерингу чан бувну, инфарктраягу уру­ччайссар:
— НицIал 2 накьлил къуса, 3 чяйлул къуса дарчиндалул (корицалул) хIала дурну гъилисса 2 стакан щинащал, хIачIайссар гьантлун 3-ла.

КIиз кьатIа тIутIи­мин­нансса дарув:
— КIири дурсса зайтундалул (оливковое) аьгъушивруву ца накьлил къуса ницIал, ца чяйлул къуса дарчиндалул дирхьуну, ххуйну хIала дайссар. КIизул мархрайх буккайссар бакI шюшин 15 минутIрал хьхьичI ва дарув.

ЦIумулий, ттурчIай урандалул цIуцIаву думиннансса дарув:
— НицIал ца накьлил къуса хIала дурну ца чяйлул къуса дарчиндалущал, канан аьркинссар зурул мутталий гьантлун 3-ла.

— КIиз кIукIлуну, парх бив­кIун бикIаншиврул, минерал щинай вилагларча хъинссар.

— Лажиндарал бурчу, кIукIлугу хьуну, бювчIуну бикIайссар, накIлий лажин шюшларча ягу щюлли чяйлул заваркалий атил бувсса паммалул тампон лажиндарайх букларча.

— ИникIма дяргъларча каруннил бурчу кIукIлу шайссар.

— Мурччив ятIулну дикIан­шиврул ца кIунтI Е витаминдалул мурччайх буккайссар уттубишин хьхьичI.

ТартнакIлил ва гречкалул иникIмалул хъунххютту марцI дайссар, оьттул туннурду марцI байссар, обмен веществ, нацIу дикIул (поджелудочная железа) даву цила ххуттай дитайссар, оьттуву нацIушиву чан дайссар. Мяйжаннугу инсаннал цIуллу-цIакьшиврун хъинну кумаг бай­ссар ва рецептрал:
-Ца накьлил къуса гречкалул ккурпалул кофемолкалувух гьаяйссар. Яла ми бичай­ссар кефирданул бувцIусса стакандалувун, ххуйну хIалагу бувну, бишайссар холодильникраву. КIюрххил за дукан дачIи ссят­рал хьхьичI хIачIайссар вай тартнакI. Ва дарув буллалияра 14 гьантлий.

Гьарзат ххуйну шюшайссар:
ТIахIни-кIичIу, ваннарду, раковинарду шюшайсса универсальныйсса средство, аллергиягу къадайсса, цурдагу дурагу 3 компонентрая дурсса, экологиялул чулухагу хъинну марцIсса, каруннил бурчугу кьакьан къабайсса.
— Ссуссулух ссувссунну янна шюшай ссахIван (хозяйственный), бучIиссар оьрчIалмур ссахIвангу, мунил 100 гр. ялун дутIайссар 100 гр. гъилисса, хъиннура хъинссар кIирисса, щинал, ххуйну хIала дайссар хьама хьунцIа. Вайннул ялун бичайссар 75 гр. содалул. Шай­ссар паста. Ялун бучIиссар винна ччимур эфир масло дутIин. Гьарзат цIай-цIай тIутIи дай­ссар. ТIахIни-кIичIу, раковинарду, ванна, аьгъушивугу ххуйну марцI дайссар. Кафельгу цIай-цIайтIи байссар.
ЦIуллуну битаннав
Т. ХIажиева