Лакрал райондалий оьрчIал ва чIаважагьилтурал спортшкола тIивтIуну гьашину там хъанай дур 35 шин. Му иширан хасну алхIат кьини Гъумучиял спортзалдануву хьунни гьарца шинал шайсса столданий теннисрай буккаврил турнир. Му хIадур дурну дия райондалул спорткомитетрал ДЮСШ-лущал цачIуну. Бяст-ччал бия дуклаки оьрчIал ва оьрмулул хъуниминнал дянив.

Турнир тIиртIуна спорткомитетрал хьхьичIунсса пишакар Малик ХIусмановлул. ДЮСШ-лул директор Шарапуттин Хановлул бувсуна райондалул оьрчIал ва чIаважагьилтурал спортшколалул 35 шинал лажиндарай бивтсса ххуллия, хьхьичIуннайшивурттая.
Турнирданий гьуртту хъанахъиминнан тIайлабацIу чIа увкуна жагьилтуращалсса ва оьрчIащалсса даврил отделданул хъунама МахIаммад Гадаевлул.
Бяст-ччаллий гьуртту хьунни Гъумучиял школалул ва лицейрал, Хъурхърал, КIундиннал, ГьунчIукьатIрал, ЧIурттащиял ва Хъунайннал школарттал дук­лаки оьрчIу.
Бяст-ччаллил хIасиллайн бувну дуклаки оьрчIал дянив 1-мур кIану бувгьунни Хъунайннал школалул дуклаки оьрчI МахIаммадов Рамислул, 2-мур кIану – Хъурхърал школалул дуклаки оьрчI Ттупчиев Салманнул, 3-мур кIану – Гъумучиял лицейрал дуклаки оьрчI МахIаммадов Ситтикьлул.
Оьрмулул хъуниминнал дянивсса бяст-ччалливу гьуртту хьунни районнал шяраваллава­сса 26 инсан. Миннал дянив 1-мур кIану бувгьунни ХIусайнов Альбертлул, 2-мур кIану – Жаб­раилов Маликлул, 3-мур кIану – Ханов МухIаммадлул.
Чутсса журалуву гьуртту хьунни 8 чут. Миннал дянив 1-мур кIану бувгьунни Жабраилов Маликлул ва АлхIасанаев Бухаринал, 2-мур кIану – Аьшаев Илияслул ва МахIаммадов Рамислул, 3-мур кIану – ХIусманов Маликлул ва Ханов Шарапуттиннул.
Ххув хьуминнан ва хьхьи­чIунсса кIанттурду бувгьуминнан сакиншиннарал комитетрал чулуха буллунни дипломру ва арцуйнусса бахшишру.
Зулайхат Тахакьаева