Июльданул 2-нний Дагъус­ттаннал МЧС-рал каялувчитурал дунни Дагъусттаннал шагьрурдащалсса, районнащалсса селекторданул зумунусса совещание — видеоконференция. Ва хас дурну дия щала Аьрасатнаву нанисса «Безопасный город» программалун.

Ккуллал райондалул чулуха ваниву гьуртту хьунни райондалул ГО ва ЧС-лул хъунама Кьурбайтаев Ажуб, райондалул ЕДДС-рал (Единая дежурно-диспетчерская служба) хъунама ХIасанов Аьли-Юсуп, райондалул 32-мур пожарный частьрал хъунама Шагьабуттинов Тажуттин ва дежурный диспетчер Рашидов МахIаммад.
Совещаниялий бувчIин буллай бия ва программа дачин дуваншиврул цукунсса хъиривлаявуртту дикIан багьлагьиссарив. Учиннуча, райондалий мониторинг дурну, лекьан бюхъайсса зунттурду, лахIунтту, ламурду бусса кIантту хIисавравун ласун, ххуллурдай, заправкардай, подстанциярттай, инсантал бувцуну заназисса машинар­ттай камерарду бишин багьлай бусса бия. Мукунма школардай, оьрчIал багъирдаву, чIявусса инсантал батIайсса кIанттурдай. Вай циняв камерарду зун тIий бусса бия Глонас системалуву. Походрай нанисса туристал къабяйкьиншиврул, гайннахьсса телефоннаву бикIан багьлай бу­сса бур цува чув уссарив ккаккан буллалисса баян бавуртту.
БакIраяту Дагъусттаннай ва система зузи дуван ччай бивкIун бур пилотный прог­раммалул зумуну цаппарасса шагьрурдай. Амма Аьрасатнал МЧС-рал тIалавшинна дусса дур циняв шагьрурдаву ва районнай дикIан багьлай бушиву. Мунийн бувну, Дагъусттаннал МЧС-рал пишакартурал бувчIин бувна цукунсса давурттив дуллан аьркинссарив кIанттул зузалтрал. Ци-бунугу хьусса чIумал оьвчин бучIину бусса бия цасса 112 номерданий. Ваний оьвкусса чIумал ва номер багьайсса бия диспетчер службалийн, полициялийн, Анаварсса кумаграйн, пожарниктурал частьрайн.