ХьхьичIава (дакIний бакъар щархъиял хъатIай кIиянна дайсса диркIсса) Гъумучиял цавагу хъатIи къабайссия кIиянна къадурну. ЦIанакулгу нажагьсса хъатIай Гъумучиял дуккан дайссар кIиянна.

Дайссия кIиянна душнихъал жалин дуцин бувкIминнайх дачIин, къадирну къаличIан, увкIма хIарачат буллай икIайссия (арамтал, хъами личIи бакъа) кIиянна ласун. КIиянна дангу цалва гъан-маччанайн, чIахху-чIарахнайн, вихшала думиннайн оьвчайссия. КIиянна дуллай бивкIмигу цаягу шаппай му къаларсун къалагайссия. Укунсса дия гъумучиял хъатIул аьдат.
ХьхьичIва-хьхьичI, дайссар качар-писукрая ницI. Жалин дуцин бучIансса инсантал хIисавравун лавсун, 1 кг. писукрайн, 2 стакан щинал хIисаврай дуртIуну, кIункIур щаращи байссар. Ца кило писукрайн ца къеп лимонцIилгу бичайссар (вай чIяву хьурча, кIиянна турщисса шайссар). Щаращи байссар кIункIур дянивсса цIарай, ницI хьунцIа (ницI хьусса кIул хьун, щин дуртIусса чяйлул бушкъаправун ца кIунтI ницIал бутIайссар, агарда га, экьикъалавгун, кIунтIнува личIарча, ницI хIадурссар).
КIияннарансса ницI дайссар дукьра-дукьрану. Шайхту гай дутIинсса кIурглу хIадур байссар. ЛакъачIун кIурглу аьгъу байссар ччимур аьгъушиврий, гивун дутIайссар щаращисса ницI. ЧIарав бишайссар кару атил дуллансса дяркъусса щинащалсса кьакIичIурдугу. НицI каниву зузи дансса даражалийн дирукун (чансса дяркъуну), къусух ласавай, атилсса канил дугьавай, ца канива гамур канил кIиссурттал кIункIу дуллай, лахъи дуккан дуллай, ца зума ца канил кIиссурттал, гамур вамур канил кIиссурттал кIункIу дуллай, кIидахIавай, ялагу зумарду кIункIу дуллай, цурдагу дяргълагъиссаксса кIяла лаглан дикIайссар, кIиянна хъанахъиссаксса, карунницIунгу лачIлан къадикIайссар. Яла, махъ, хIинча кунна кIура даен дурну, кIирагу зума цачIун дурну, целофандалуву дишайссар. КIиянна хIадурссар.
КIиянна дуллай бивкIминнахь цIухху-бусу бувну, чивчуссар Т. ХIажиевал