Райондалул администрациялул ОьрчIащалсса, жагьилтуращалсса даврил ва туризмалул отделданул, КIулшиву дулаврил ва Магьирлугърал управлениярттал сакиншиннарайну тталат кьини Гъумук Хъунмасса Буттал КIанттул цIанийсса дяъвилия зана къавхьуминнал гьайкалданучIа хьунни Ххувшаврил 71 шин шаврин хас бувсса аьдатравун багьсса Аьпалул Вахта тIитIлатIисса батIаву. Гьашинусса Аьпалул Вахталул лагрулуву Гъумучиял цIусса кIичIираваллин дирзунни летчик-штурман, Хъунайннал шяраватусса Шахшаев Исмяил ШайхмахIаммадлул цIа, царай къатрал чIирай лачIун дунни аьпа­лул ула. Муний гьуртту хьунни райондалул ва шяраваллал бакIчитал, идарарттал хъуними ва зузалт, учительтал ва дуклаки оьрчIру, Исмяил Шахшаевлул гъан-маччами, шяраваллил агьлу. Буйнакск шагьрулул дяъвилул ва захIматрал ветерантурал советрал хъунама, Ю. Акаевлул цIанийсса Боевой славы музейрал директор Аьбдуллагь МахIаммадов бакIчисса делегация бувкIун бия шагьрурдаягу. Гьантлия гьантлийн ххялтIа дуклай дур дяъвилул цIаравух бувкминнал кьюкьа. Жущалва бумигу шанурдацIух буну, махъсса шиннардий Аьпалул Вахтарду бан багьлай бур, цуксса хIайпнугу, цаягу ветеран гьур­тту акъана. ГьайкалданучIа тIутIал шал­ккагу бивхьуну, Аьпалул Вахта тIивтIуна райондалул бакIчи Юсуп МахIаммадовлул. Райондалул администрациялул ва депутатътурал цIания дяъвилул ветеранталгу, мунийн бавтIмигу барча буллай, кIицI лавгуна дяъвилул майданнайва ливчIсса жулва ватанлувтал цIунилгу хIурматрай дакIнийн бивчуну, миннал рухIирдая алхIам був­ккуну, хъун хъанахъисса никирахь та яла оьттул ттур дурксса дунияллул кIилчинмур дяъвилий жулва ппухълуннал дур­сса виричушивурттая бусаву ва хIакьину жущалва буми ветерантурахь Бюхттулсса Ххувшаврихлу барчаллагь учаву мурадрай, гьарцагу шинал апрель зуруй Ххувшаврил байрандалул хьунийн щалвагу билаятрай шайшиву аьдатравун багьсса Аьпалул Вахтарду. Бувсуна райондалул щархъавусса Хъун дяъвилия зана къавхьуминнал аьпалунсса гьайкаллах райондалул администрациялул хъуннасса аякьа дуллай бушиву, ми гьарца шинал Ххувшаврил байрандалул хьунийн дакьин дайшиву, цIудуккан дайшиву. — Бувккусса гьантри ливчIун бур щалвагу Аьрасатнал агьлу жулва билаятран яла ххирану дарцIумур ва яла пахрулун лайкьмур байран — Бюхттул­сса Ххувшаврил кьини хьунадакьин. Ххувшаву ларсун 71 шин гьарчагу, никирая никирайн яла къагьантIиссар та дяъвилул къювугу, асардугу. Лакрал райондалий бакъахьунссар цавагу кулпат Хъун дяъвилул щавщи къабивсса. Жулла райондалия аьрайн лавгун бур ряхазарунния ливчу­сса чиваркI. Ми талай бивкIссар гьарцагу журалул аьралуннаву – кьирийгу, хьхьирийгу, гьаваллавугу. ЧIирисса Хъунайннал шярава увксса Исмяил Шахшаев хъанай ур дяъви байбивхьуну цалчинсса гьантрайва Берлин ласаврил цIанийсса талатавриву гьуртту хьусса дагъусттанчу. Дяъвилий ванал дурну дур 223 талатаврил леххаву, лайкь хьуну ур кIива ЯтIул цIукул ордендалун, Буттал КIанттул цIанийсса II-мур степеньдалул ордендалун. ИвкIуну ур оьрмулул 27 шинаву, аьрали бурж биттур буллай унува, — увкуна Юсуп МахIаммадовлул. ГьайкалданучIату циняв­ппа лавгуна Исмяил Шахшаевлул цIа дизлазисса кIичIиравун. Аьпалул улттуя пардав дуркьуна Исмяиллул уссил Аслан ЩайхмахIаммадовичлул ва Буйнакск шагьрулул ветерантурал советрал хъунама Аьбдуллагь МахIаммадовлул. Дуклаки оьрчIал дирхьуна тIутIив. Цала шяравучунал цIа абад даврихлу Аьбдуллагь Ма­хIам­мадовлул барчаллагь увкуна Лакрал райондалул бакIчинахь. Пишкаш бувуна Буйнакск шагьрулул Боевой Славылул музейрал зузалтрал захIматрайну сакин був­сса Хъунмасса Буттал КIанттул цIанийсса дяъвилуву талай бивкIсса хьхьиричитурая бусласисса лу.