ЦIуссалакрал райондалийсса хъунмайданнив хьунни Дагъусттаннал Конституциялул кьинилун хас дурсса шадлугъ, райондалул учреждениярттай каялувшиву дуллалими, жяматрал вакилтал ва кIанттул властьрал заллухъру гьурттуну.
Жямат барча бунни райондалул хъунама ХIажи Айдиевлул. «Дагъусттаннал Конституциялул гьану бивзссар республикалий демократия цIакьсса ва социал ихтиярду дурурччусса общество хIасул даврин. Дагъусттан — авадансса тарих бусса республикар, мунил хъунмур хъус-ххазинагу бавкьуну, нахIуну яхъанан ччисса миллатрур. Дагъусттаннал гуж-кьуватгу жулла цашиврувур ва дусшиврувур бусса, республикалул агьаммур законгу жунна цумацаннангу вихшаласса гьану хьун аьркинссар жура дуллалисса мюрщи-хъунисса давурттаву», — увкунни мунал.
Жямат барча бунни Дагъусттаннал Халкьуннал Мажлисрал депутат Зайнулла Мирзоевлулгу. Гиккура майданнив дия базаллувунияр кьюркьуну шяраваллил хозяйствалул продукция дахлахисса ярмаркагу. Райондалул Культуралул центрданул артистурал ва шяраваллава бувкIсса культуралул коллективрдал ккаккан дунни хъуннасса концертгу.
