Уттигъанну Москавлив Дагъусттаннал муданмасса вакилханалий хьунни ДР-лул искусствалул лайкь хьусса ишкка­кку Жанна Кьурбановал «Ххаллал макьан» («Мелодия ниток») цIанилусса выставка.

Выставкалувух гьуртту хьунни Москавливсса «Дагъус­ттан» центрданул члентал, художниктал, Москавлив ялапар хъанахъисса дагъусттанлувтал.
Шадлугъ дайдирхьуна Москавливсса Дагъусттаннал Муданмасса вакил Изумруд МухIуттиновал.
— Жаннал творчество жунна дикIайкунсса тIитIалану хъана­хъиссар. Ва ляличIисса формат Да­гъусттаннал вакилханалий цалчинни ккаккан дуллалисса. Му бакъа­ссагу, Жанна ххаллилсса балайчигу бур. Ва чялишну гьуртту хъанай бур республикалул творчествалул оьрмулувухгу, — увкунни ванил.
И. МухIуттиновал бавтI­миннайн оьвкунни Воробьевы горы метролуву уттигъанну тIиртIусса «Да­гъусттан – халкьуннал художествалул касмурдал заповедник» тIисса выставкагу ххал дуван.
«Дагъусттан» центрданул президент, профессор Арсен ХIусайновлул цалвамур ихтилат­раву кIицI лавгунни Жанна Кьурбанова хъанахъишиву Центрданул дуллалисса чIярусса шадлугъир­ттал гьурттучину.
Ихтилатру бунни АьФ-лул лайкь хьусса художниктал Клара Власовал ва Карахан Ссапарбаговлул, цIа дурксса художник Олег Пирбудагъовлул, искусствовед ПатIимат ХIаммадовал ва цайминнал.
Жаннал цилвагу лавхъунни махъ, бавтIминнахь барчаллагь тIисса дурсса чIарав бацIаврихлу, увкусса тIааьнсса мукъурттихлу. Цила мандолинагу бивщуну, бавтIминнан бахшиш бунни ххаллилсса лакку балайрду.
ХIадур бувссар
Бадрижамал Аьлиевал