Лагма-ялттусса ва щалагу дунияллийсса тагьар сававну жунма аьлтта чIалай бур Аьрасатнал паччахIлугърал экономика саргъунну нани дан захIматну бушиву. Мукунсса кIанттул асар бияврин ккалли буван бучIир дукIугу, гьашинугу, пенсиялийн бувккун бухьурчагу, зузисса инсантуран пенсия гьаз къабаву. ТIайланма учин багьлай бур, яхьунсса кьяйдалийсса пенсия бивкIссания, вай пенсиялийн бувксса инсантал чIявуми къазунтIиссия.

Укун инсантал кIибачIлачIисса чIумал, хIасул хъанай дикIай инсантурал рязи бакъашивуртту. Вана, Самара шагьрулий хьуну дур зузиминнангу пенсия гьаз бувара тIисса инсантурал митинг.
ХIакьину цанна дагьлагьимунил ва къадагьлагьимунил хIисав дуван къашайсса инсан акъар. Шикку мисал буцин, 2015-ку шинал хьусса инфляциялийн бувну, 2016-ку шинал му­тталий на ласун багьлай бивкIсса пенсиялул дур 28 500 къуруш чанну ларсун. Вайннуя ттун зана дурунни дурагу 5000 къуруш. Ласун багьлай бивкIсса ттул харжгу, инфляция хIисав дурну, шинал мутталий 36 000 къурушрал чан хьуну бур. Аьмну шинал мутталий на къаларсун дур 50 000 къуруш. Вай хъанахъиссар, яхьун аьркиншиврун ккаккан дурсса арцу хIисавравун ларсъсса чIумал, ряхва зуруй яхьун бюхълай бивкIсса арцуну.
Бусияра зугу зулами пикрирду.