Кказит дахьва тIивтIусса шинну диркIссар билаят ва рес­публика политикалул, маэшатрал ва социал ххуллурдал шанбачIулий бавцIусса, цумур ххуллу язи бугьантIиссарив къакIулсса, цалий къабавцIусса заманалул шинну.

Гай ччанар­ккусса шиннардий «Илчи» кказит, цила язи дургьусса ориентирданиягу бякъайкьуну, най бивкIссар хьхьичIунмай. ЦацIунма цалва буккултгу бувцуну. Цумурцагу кказитрал ягу политикалуха зузиманал ахир дучIайссар, агарда ганий бишлай бухьурча так хъуниминнан баян ва буккин ччимур ягу цалва пикри-зикри бакъа, чIявуминнал тIутIимунил хъирив ачирча. «Илчи» мудангу най бивкIссар цала буккугу цащала увцуну, муная ят къабувцун. Увцуну най бивкIссар миллатрал ххазинардачIан, миннуя пахру буллали уллан. Увцуну най бивкIссар цалва миллатрал культуралучIан, тарихрачIан, сайки совет шиннардий бявххуну, хъамабитулул шавай ливчIсса. Ахиргу, увцуну най, иян увссар цала ниттил мазрачIан, кIул ув­ссар му бухлаган бюхъайшиврул нигьачIисса масъалалущал. Ла­кку маз бухлаган бюхъайшиврул нигьачIишиву ялун лирчуссар 1980-ку шиннардил ахирданий ва 1990-ку шиннардил дайдихьулий. Ми шиннардийя лакку мазраву ялтту буклан бивкIсса оьрус мазрал бияла. Ца цалва миллат­рал масъалартту бакъа, цайми-цаймигу дунияллий хъанахъисса масъалартту гьаз байсса «Илчи» кказитрал коллективрахь, ца лакрал буккултрал бакъа, да­гъусттаннал вайми-ваймигу миллатирттал буккултрал хъунма­сса барчаллагь учин аьркинссар. Цанчирча, Зулайхат Тахакьаевал, ХIажимурад ХIусайновлул, ХIасан КIуруховлул, Сагъират Ссунгъуровал макьалартту кIулссар чIявусса буккултран.
Кказитрал каялувчишиву дуллай бур чIявусса кIанттурдай цил хIурмат лахъсса, журналис­тикалул хIалкьазия кIулсса, печатьрал даврил хIал кIулсса, гьунар бусса ва дирисса менеджер, мукъул усттарсса ва дакI тIиртIусса интернационалист, гуманист Качар ХIусайнаева. Ванил хIарачатрайн, гьунарданийн ва бюхттулсса интеллект­райн бувнур этнокультуралун захIматсса чIунну дуркIсса шиннардий цалагу, кказитралгу сийгу, сиппатгу яхьусса.
«Илчи» кказитрал щалвагу коллектив барча буллай 25 шинал юбилейращал, чIа тIий ура вания гихунмайгу дуллалимуниву тIайлабацIуртту ва так хьхьичIунмай бачинсса умуд ва хъинмунийнсса вихшала!
Аьвдурашид Сяидов,
ш. Москав