Ларгсса нюжмар кьини Лакрал театрдануву лахъа-хъунсса даражалий хьунни «Илчи» кказит цIуницIакул дунияллийн бук­лай байбивхьуну 25 шин кIицI лаглагисса шадлугъ. БувкIун бия мунийн лакрал интеллигенция, «Илчилул» буккулт, миллатирттал кказитирттал редактортал, даврил уртакьтал.

Зулайхат Тахакьаева
Кказитрал щалва коллективгу сахIналийн буккан бувну, шадлугъ тIиртIуна хъунмур редактор Качар ХIусайнаевал. Ванил хъирив ихтилат бувуна хъунама редакторнал хъиривчу Руслан Башаевлул. Гихунмай мажлис бачин бувну ия Дагъус­ттаннал халкьуннал артист Аслан МахIаммадов. Ванал бакIра-бакIрах тамашачитуран кIул увуна кказитрал гьарцагу зузала.
1917 шинал бувксса «Илчи» кказит­рал кутIасса, амма хъинну яргсса тарихгу дакIнийн бувтун, хIакьинусса кказитрал даврин кьимат бишлашисса ихтилат бувна аьлимчу Эса Аьбдуллаевлул.
Муния махъ «Илчилул» кьини барча дуллалисса цилва ихтилатраву ДР-лул печатьрал ва информациялул министр Бурлият Токболатовал увкуна:
— ХIурмат бусса Качар Абачараевнай, дагъусттаннал журналистикалун бахтти хьуссар ина кунмасса, вил уртакьтал кунма­сса инсантал редакциялий зий бушиву. «Илчи» кказитрал коллектив лавайсса пишалул ус­ттартурая сакин хьусса, дагъусттаннал журналистикалул ттугъ бюхттулну лавсун нанисса, сий хъунна­сса коллективри. Так аькьил­сса каялувчинащар мукун бавкьу­сса, цайминнал дахIалай учин­сса коллектив лагма лаган бан бюхъайсса. Вин хъунма­сса барчаллагь! Вил дакIнил чумартшиву ттунгу эбратну хьу­ссар, ина ттунгу насихIатчину хьуссара. ХIакьину чIун жапасса дур, журналистнал пишагу къабигьасса пиша бур. НигьачIисса бушивруцIун, цайминнан къачIалачIимургу чIаланшиврул, цайминнаяр бакIрал лавайну, шаттирал хьхьичIунайну икIан ялув буллалисса пиша бур. ЧIа тIий бура зун тIайлабацIу, кказитран хьхьичIуннайшиву.
Ихтилатрая махъ министрнал дуллуна паччахI­лугърал наградартту: кказит­рал хъунмур редактор Качар ХIусайнаеван – ХIурматрал лишан «За любовь к родной земле»; жаваб дулайсса секретарь Руслан Къардашовлун ва отделлал редактортуран: Андриана Аьбдуллаеван, ПатIимат Рамазанован, Зулайхат Тахакьаеван, ХIасан Аьдиловлун – «Дагъусттан Республикалул культуралул лайкь хьусса зузалал» цIарду.

ДР-лул культуралул министр Зарема Буттаева:
— 25 шинал манзилданий жула республикалул информациялул пространствалий «Илчи» кказит­рал бувгьуссар лайкьсса кIану. Мудангу буссар республикалул оьрмулул тарглий ка дирхьуну най. Мунияту зул буссар дакI тIайласса буккулт. Республикалул жяматийсса ва сиясийсса оьрмулуву хъанахъимуния ватанлувтурахь буслай, буккулт личIи-личIисса темардал ялув пикри буллали буллалиссару зу. Кказитрал яла агьаммур мурадну тIурча хъанахъиссар лакку маз буруччаву. Хаснува багьа ба­къасса даврин ккаллиссар зул журналистурал республикалул магьирлугърал оьрмулуву хъана­хъисса иширттая ляраличIисса ччаврий ва къулагъасрай буслай бушиву. «Илчи» кказит жул вихшаласса дусгур, дакI тIайласса кумагчигур, цасса культуралул ва информациялул пространство хIасул давриву жун кабакьу буллалисса.

Культуралул министерствалул чулухасса ХIурматрал грамотарду ва арцуйнусса бахшишру дуллуна отделданул редактор Зулайхат Тахакьаеван ва корреспондентътал Залму АьбдурахIманован, Бадрижамал Аьлиеван.

ДР-лул виваллил ишир­ттал министр Аьбдурашид МахIаммадовлул кIицI лавгуна «Илчи» кказитрал багьа ба­къасса даву дуллалишиву миллатрал маз ябан. Кказитрал гьаз дуллалисса агьамсса темардаву хаснура хъуннасса къула­гъасралу душиву терроризмалийн къаршисса темардугу.
Кказит буклай байбивхьуния шихунмай низам дуруччай органнащал уртакьну зузисса журналист Андриана Аьбдуллаеван дуллуна ДР-лул МВД-лул ХIурматрал грамота, арцуйнусса бахшиш ва пишкаш бувна ноутбук.
Республикалул хъуншагьрулул администрациялул зузала Жамалуттин Кьурбановлул дурккуна МахIачкъалаллал мэр Муса Мусаевлул чулухасса барча баву.

Москавливсса дагъусттанлувтурал цIания «Илчи» кказит­рал кьини хъун дан увкIун ия профессор Арсен ХIусайнов.
— ЦIуну буклай байбивхьусса «Илчи» кказит хьуссар ХХ-мур ттуршукулул байбихьулий буклай бивкIсса «Илчи» кказит­рал тарихийсса варисну, лакрал миллатрал аслийшиву, мунил маз ва магьирлугъ дуру­члачисса майданну. Кказит хьу­ссар лак­рал миллат цачIун буллали­сса, магьирлугърал, кIулшиву дулаврил ва социал-экономика хьхьичIуннай даврил буруккин­тту гьаз буллалисса центрну.
Миллатрал маз, тарих, магьирлугъ ядансса хIарачатрахлу «Илчи» кказитрал редакциялийн барчаллагьрай буссар Москавливсса «Дагестан» культуралул центрданул ккуран – зул муданмасса буккулт. Жу зуя пахрулий буссару, зущалсса дусшивугу дуручлай буссару, — увкуна А. ХIусайновлул.

Аьрасатнал Журналистурал союзрал секретарь, Дагъусттаннал Журналистурал союзрал хъунама Аьли Камалов:
— ХIакьину цинявппа миллатирттал кказитирттал чивчунни «Илчи» кказитрал коллективрахь юбилей барча дуллали­сса махъру. Лахьхьу ттучIанма «ХIакъикъат» кказит лавсун бучIайхту, хьхьичIмукъуву чивчусса «Гьунар ххисса каялувчи Качар ХIусайнаеващал кказитрал коллектив ккалли бан бучIиссар лакрал интеллигенциялул хьхьичIунсса ва авангардсса бутIун» тIисса кIану на бакьин бувссия «ккалли бан аьркинссар» куну. ХIакьину жунма сахIналий ккавккунни му бутIа. Так вайннавух акъар, къашавай уну, ХIасан КIурухов, кказит дахьва итабакьлай байбивхьуния шинай чIарав ивкIсса инсан, гьунар бусса журналист ва шаэр. Тани кказит итабакьлай ивкIссар увагу 5-6 инсан, циняв ца кабинетраву щябивкIун. 11 зиву дусса къатраву лявкъуну бакъая вайннахьхьун булунсса кIану. Мукунсса шартIирдаву зий, кказит ччясса мутталий 70-75 шинай зузисса кказитирттал хъирив лавссар. ХIакьину тIурча «Илчи» кказит республикалул кказитирттаву хьхьичIунсса ххуттаву буссар.
ХIакьину ва залданувун бавтIун бур миллатрал бур учин­сса инсантал. Ттунма къабувчIлай бунугу, ттун лап ххуй бивзунни мажлис лакку мазрай байбишаву. Ххуй бивзунни Эса Халидовичлул дакIнийхтунусса ихтилат. ХIакьину тагьар зунна чIалачIисса дур. Миллатирттал кказитру мюрщи буллай, номерду чан буллай бур. Му миллатрал маз ссуссукьу бавур. Мунияту мазралгу, кказитралгу кьадар миллатрал кIунттихьри бу­сса. Буруччияра зулва кказит, мабитару бухлаган зулва маз, культура ва аьдатру.

Дагъусттаннал Журналис­турал союзрал чулуха­сса ХIурматрал грамотарду дуллуна Руслан Къардашовлун, ПатIимат Рамазанован, Имара Саидован ва Залму АьбдурахIманован.

Хъирив сахIналийн лавхъуна, «Илчи» кказитрал байран лайкьсса даражалий хьуншиврул, лакрал интеллигенциягу лагма лаган бувну, сакиншиндарал комитетгу бавтIун, хъунмур хъаргу цайнна ларсъсса Лак­рал райондалул бакIчи Юсуп МахIаммадов ва ДР-лул Хъунисриннал советрал председательнал хъиривчу Сиражуттин Илиясов.
— Жунна цинявннан дакIний­ссар цукунсса диркIссарив 90-ку шинну – паччахIлугъ ппив хьу­сса, халкь аьраттал бувксса, агьалинаву питнарду сукку хъана­хъисса. Мукунсса шартIирдавугу «Илчи» аькьилсса дянивчуну бувкссар. Качар Абачараевнаща бювхъуссар, халкьуннавун сси-цIу багьан къабивтун, дянивалу дугьан ва дуруччин, миллатрал интересру буруччин. ЧIявусса лакрал цIания барчагу буллай, барчаллагь тIий ура лакку кказит бюхттулсса даражалийн биян баврихлу.
ХIурмат лавайсса Качар Абачараевнай, Республикалул БакIчинал дуллусса наградагу барча дуллай, мунияргу хъуни­сса наградартту лайкьссар вин, тIий ура. Яла хъунмур наградану тIурча вин хьуссар вила миллатрал дазу дакъасса ччаву ва хIурмат. ДакI дарцIуну ура ина вила коллективращал ттигу чIярусса шиннардий зунссара лакрал, Дагъусттаннал ва щалагу Аьрасатнал цIаний, тIий, — увкуна Сиражуттин Илиясовлул.
— ХIакьину жува кIицI лаглай буру щалва миллатрал байран – «Илчилул» кьини.
Хъунмур никиран дакIний буссар цуксса хъуннасса тIалавшин диркIссарив, цуксса захIмат бивхьуссарив миллатрал кказит цIунил итабакьлай байбишин. ХIакьину жущава дакI дарцIуну учин бюхълай бур – цийн бихьлай бивкIсса умудру «Илчилул» щаллуну бартбивгьунни куну. Шиная шинайн машгьур хъанай, магьир хъанай, «Илчи» хьунни лакрал гьарца къушлил дус, цихгу гьарца нюжмардий мякьну ялугьлагьи­сса. Ци-цигу аьрххи-ххуллурдайн буцару жува «Илчилул», кIул бару Лаккуйгу, Дагъусттаннайгу, щалла дунияллийгу хъана­хъисса иширттащал. Кказитрал тематика хъинну авадансса дур. Миннувугу яла къулагъасралусса бур лакрал тарих ва тарихийсса ишру, лакку маз ххазинану ябаву, лакку аьдатру дуруччаву, лак цачIун баву. Дагъус­ттанналгу, Аьрасатналгу дазурду диртун, «Илчи» биллай бур цайми-цайми билаятирттайнгу. Ва бакъарив зу бихьлахьи­сса лавайсса захIматран кьимат. «Илчигу», зугу буссаксса, дунияллийх кIама бивщусса лакран мяйжаннугу цивппа ца миллатну, ца кулпатну асар хъанай бушиврий дакI дарцIуну зузияра, — увкуна Юсуп МахIаммадовлул.
Лакрал райондалущалсса цIакьсса дахIаву дуну зузисса журналист Зулайхат Тахакьаеван дуллуна ХIурматрал грамота ва арцуйнусса бахшиш.
Муния махъ Сиражуттин Илия­совлул лакрал интеллигенциялул чулухасса бахшишран арцущалсса конвертру бавчIуна «Илчилул» гьарцагу зузалайх.
«Илчилул» кьини хъун дан бувкIун бия лакрал цIанихсса балайчитал: Дагъус­ттаннал Халкьуннал артистка Лариса ХIажиева, Дагъусттаннал лайкь хьусса артистал Загьидат Муслимова, ХIажиаьли ХIажиаьлиев, Карин Кьадинаев. Лакрал райондалия бувкIун бия «Щаращи» конкурсрай хьхьичIунсса кIантту бувгьусса Садикьова Аида ва МухIадов Малик. Аидал балайрду увкуна, Маликлул дурккуна «Гъази-Гъумучияхасса» Руслан Башаевлул назму. ЦIуссалакрал райондалия увкIун ия ххаллил­сса балайчи Аслан Муслимов ва дюхханну назмурду дуккаврийну лакран машгьур хьусса Султанов Батирхан. Ванал дурккуна Абачара ХIусайнаевлул «Та гъидайдихьулул цалчинсса кьини» тIисса назму.
Театрданувусса «Илчилул» кьинилул шадлугъ ларкьуна кказитрал коллектив цIунилгу сахIналийн буккан бувну, тамашачиталгу лавай бивзун, цинявн­нал Лакку кIанттул гимн щаллу даврийну.
Гихунмай «Илчилул» кьинилул савлугърансса мажлис бия «Барракуда» ресторандалуву. Му мажлис усттарну бачин бувну ия лакрал гьарцагу ишираву узданну чIарав ацIайсса хIакьсса лаккучу, «Илчилулгу» дакI тIайласса дус, ДР-лул Жяматийсса Палаталул хъунаманал хъиривчу Ссапар Аьбдуллаев. ЧIявуя гиккугу «Илчи» лахъа-хъун буллалисса, кказитрал коллективран лайкьсса кьимат бишлашисса ихтилатру.
— Дунияллийх кIама бивщу­сса лак мархрая ябуцан къабитлатиссар «Илчи» кказитрал. Му гьарцагу нюжмар кьини цумацагу лаккучунал ужагърайн хъинсса ссайгъатну бухлахи­ссар. Буккулт муних, ца яла язима хъамаличунах кунма, ссавур дакъа ялугьлай буссар. На ттула миллатрацIун «Илчи» кказит­ралла бавхIуну бусса. «Илчи» кказитрайну асар хъанай дур ттун накIлил мазрал кьанкь, накIлил мазрал нахIушиву. Ци кIану бугьлагьи­ссар ялагу «Илчи» кказитрал ттул оьрмулуву? ХьхьичIва-хьхьичI, ххирасса Качар Абачараевнай, ла­кку маз къакIулма ламусравун утанну вил зумату экьинанисса пасихIсса, щинтасса лакку мазрайсса ихтилатри. «Илчи» лавг­мунищалсса магьирлугърайнусса дахIавур, Гьарун Саэдовлул, Саэд Габиевлул ва цаймигу лакрал цIанихсса арсурваврал цIарду абад дуллалисса гьайкалли. «Илчи» миллатрал цIасса тарихри, миллатрал лавгмур ва бучIантIимурди, миллатрал яхIри, къириятри. Лакрал аслишиву дуручлачисса ца кулпатри, — увкуна цилва ихтилатраву жула лакрал ва дагъусттаннал гьунар бусса ишруккакку, шаэр Миясат Муслимовал.