ЦIуминалийсса ТIюх­чардал школалий махъва-махъсса гюнгутIи бивщунни 5-мур выпускрал оьрчIан.

Гьашину 11-мур класс къуртал бунни 4 оьрчIал, 9-мур класс – 17 оьрчIал. Ва выпускраву оьрчIру чансса бивкIнугу, вайннал школалул иширттаву хъуннасса хъар лархъшиву, ца зумату кунма, буслай бия цинявппагу. Акъая вайннаву цаягу, личIи-личIисса олимпиадарттай, спортрал ва цаймигу бяст-ччаллаву цалчинсса кIанттурду бувгьуну, шан-шанна, мукь-мукьра награда къаларсъсса.

ТIюхчардал школалул мажлисрай гьуртту хьун бувкIун бия: ЦIуссалакрал райондалул администрациялул бакIчинал хъиривчу ХIажи ХIажиев, ТIюхчардал шяраваллил администрациялул хъунаманал хъиривчу ХIасан ХIасанов, учительтал-ветерантал – Загьиди ХIаммадов, ПатIимат Оьмарова.

Шадлугърал мажлис тIитIлай, ихтилат бунни школалул директор ШайхахIмад Дадаевлул.
— Ххирасса оьрчIрув, учительтал, жула школа тIивтIуну дурагу ххюра шин хьунни, амма ва чIирисса чIумул дянив жущара райондалийгу, республикалийгу ххуй-ххуйсса ккаккияртту чIалачIи дан бювхъунни. ОьрчIрув, хIакьину на ца чулуха ххарину ура, зу, школагу къуртал бувну, зула-зула оьрмулул ххуллийн багьан най тIий, ца чулухагу пашманшиву дур, зуяту личIий хъанай тIий. Школалия лавгун махъсса оьр­мулуву зун хьунадакьлантIиссар захIматшивурттугу. На мукIруну ура, захIматшивурттал хьхьичI никгу къарирщуну, зуяту школалулгу, райондалулгу цIа лайкьну дуруччинсса, зува бусса кIанттурдай бусравсса инсантал хьунссар тIий. Ххуллухъин баннав! — увкунни ванал.

Хъирив школалул хIаятравун бувккунни выпускниктал. Аьдат­райн бувну, выпускниктал, Аьра­сатнал ттугълищал школалул хIаятрал лагма бувккун махъ, ми барча бунни цалчинмур классрал дуклаки оьрчIал.
ТIюхчардал школалул махъва-махъсса гюнгутIул байрандалуцIун дархIусса цалла аьдатру дур. Вайннал оьрчIал хасиятрацIун, тIул-тIабиаьтрацIун даркьусса цIарду дулайссар гьарица выпускникнан. Гьашинусса выпускниктураву бия «Компьютерный гений», «Мистер независимость», «Хранитель традиций» тIисса цIардал заллухъру.
Хъиннура ххуйсса аьдатну дур вара байрандалий учительтал-юбиляртал барча бувну, миннан бахшишру давугу, мукунна давриву хьхьичIунсса ккаккияртту чIалачIи дурсса учительтурал даврин кьимат бищавугу.

Цила тарбиялувтурахь ххуллухъин тIисса ихтилат бунни класс­рал каялувчи ва школалул завуч Кьурбанова Жамилал.
— Ттунма бахтти хьушиврун ккалли буллай бура зу кунма гьу­нар бусса, ххаллилсса класс бакIрайн багьаву. На зуйн ттул шама нарт, шама танкист, шама тяхъасса дус куну бакъа къаучай­ссия. Школалий кунма, гихунмайгу зулла дянивсса дусшиву хIура хьун мабацIари, хIарачат бувара, куртIсса кIулшивурттугу ларсун, ххаллилсса пишакартал хьун, — увкунни ванил.
Мажлис къуртал хьунни гьаваллавун шарду ва салютру итадакьаврийну.
Выпускниктурансса бахшишну хьунни Марокконавасса Аьбдулла-Аьлил балайрду.