Лакрал райондалий, Гъумук, Ватандалухлу жанну дуллуминнал гьайкалданучIа, хьунни жагьилтал Аьрасатнал аьралуннаву къуллугъ буллан тIайла буклакисса шадлугъ.
Зулайхат Тахакьаева
Муний гьуртту хьунни райондалул администрациялул бакIчинал цалчинма хъиривчу Абакар Къюннуев, Лакрал ва Ккуллал районнал аьрали комиссар ХIасан Масуев, идарарттал хъуними, чIава аьралитал, дуклаки оьрчIру ва аьралуннаву къуллугъ бан наниминнал нину-ппу, гъан-маччами.
Армиялийн наниминнахь ххуллухъин тIий, Къюннуевлул бувсунни виртталсса ватанлувтурая ва кIицIгу бунни хIакьину къуллугъ бан нанисса жагьилталгу миннан лайкьсса буккантIишиву.
ХIасан Масуевлул бувсунни кIирагу райондалия интту къуллугъ буллан гьан ккаккан бувну бушиву 40 жагьил, миннавасса цавай апрель зурул ахирданий тIайла бувккун, аьрали бурж бартбигьлай бушиву.
Жагьилтурал иширттал, спортрал ва туризмалул отделданул каялувчи Малик ХIусмановлул аьралуннаву къуллугъ бан нанисса гьарцаннахьхьун буллунни райондалул администрациялул цIаниясса насихIатрал чагъаргу.
