Проект бартдигьиншиврул аьмну 360 миллиондалунсса инвестициярду дирхьуссар, уттигу цIусса инвестициярду дачинтIиссар. ХIакьину 75 инсаннансса зузи кIантту дузал бувну бур ва производствалий, дянивну 25 азарда къуруш харжирал ласлан тIий бур зузалт.

Ноябрь зурул 25-нний ЦIу­миналий, Гьамиящиял шяраву, туркнал инвестортурал бувсса завод «Алмар Каспиан» тIитIлатIисса шадлугъ хьунни. Жу уттинингу бувсъссия му, строительствалул давриву ишла дувайсса, муххал конструкциярду итадакьлантIисса завод бушиву, агьалинал оьрмулул даража гьаз хьуншиврул сантирай ва лябу­кку буну экономика хьхьичIуннай дувансса хIарачат буллалисса ЦIуссалакрал райондалул хъуниминнал ччянира туркнал бизнесментуращал кьутIи цIакь дуршиву ва ЦIуминалийсса предприятиярттаву ца ккалли дансса предприятие му дикIантIишиврийнсса хьул-умуд бушивугу. «Алмар Каспиан» заводрахь дур 3,5 азарда гектар, миннуватугу производствалунсса кIану – 5 азарда квадратный метра, администрациялул офисрахь – азарда квадратный метра.
Завод тIитIаврил шадлугърайнгу, гьай-гьай, байрандалийн кунма бавтIун бия агьали. Жямат барча буван бувкIун бия Да­гъусттаннал ХIукуматрал председательнал цалчинма хъиривчу Рамазан Аьлиев, Предпринимательствалул ва инвестициярдал агентствалул хъунама Башир МахIаммадов, промышленностьрал ва машлул министрнал хъиривчу Александр Гальмуков, Аьрасатнал ПаччахIлугърал Думалул депутат Аьбдулмажид МахIрамов, Аьрасатнал Жяматийсса палаталул член Айгун МахIаммадов ва цаймигу къуллугъчитал, Туркнавасса хъамал. Рамазан Аьлиевлул, агьали барча буллай, бувсуна ялув кIицI лавгсса завод бувшиву «Организация судоремонтного и судостроительного производства и изготовление строительных металлических конструкций» тIисса инвестициярдал проектрал лагрулий. «ХIакьинусса мероприятие Да­гъусттаннал ва Туркнал дянив­сса арарду цIакь дуллалисса давур. Ва даву дайдихьулийра хъинчулий ккаркссия хIукуматрал, турк­нал инвестортуращал кьутIи цIакь дурссия. Проект бартдигьиншиврул аьмну 360 миллиондалунсса инвестициярду дирхьуссар, уттигу цIусса инвестициярду дачинтIиссар. ХIакьину 75 инсаннансса зузи кIантту дузал бувну бур ва производствалий, дянивну 25 азарда къуруш харжирал ласлан тIий бур зузалт. Заводрал къатри даврин, спорт­рал ва промышленностьрал объектирдан, мукунма ламурдал, тоннельлал, ххуллурдал, хьхьирил ва портрал сооружениярдан ишла дуллантIисса муххал конструкциярду итадакьлантIиссар. Ва рес­публикалун хъинну агьамшиву дусса давур, «Новая индустриализация» тIисса проектрал лаг­рулийгу республикалул шагьрурдай ва шяраваллаву производство гьаз дувансса ххуллурду-чаранну ккаклай бухьувкун», — увкуна Рамазан Аьлиевлул.
Райондалул хъунама МахIам­мадхIажи Айдиевлул бувсуна райондалий 8 инвестпроект бартдигьавриха чялишну зий бушиву, цIусса 2017 шинал кIира проект ялун ххихьунтIишиву. «Ми ацIрагу инвестпроект щаллуну бартдигьиншиврул 2,5 миллиард ккаккан бувссар, азаллийсса инсантуран давурттив хьунтIиссар, ми циняв объектирдая республикалул бюджет­равун арцу дачинтIиссар. Ва проект бакIуйн дуккан дувайхту 150 инсаннансса зузи кIантту хьунтIиссар, хIакьинусса кьини 40 инсаннансса даву хьу­ссар шикку. КьатIаллил билаятраясса инвестор Дагъусттаннайн увкIун, жулва агьулданун зунсса кIанттурду буллай ушиву тIааьн бизан­сса иш бур. Хасну ЦIуссалакрал райондалул агьали яхъанахъи­сса аьрщарай ва завод буваврия жува ххарину буру. Ва ялагу, ваналмур даврил вихшала цIакь хьусса цайми инвесторталгу бю­хъайссар кIункIу хьун Дагъусттаннайн», — увкунни ХIажи Шихамировичлул.
Агьали барча буллалисса ва завод тIитIавриха чялишну зий бивкIминнахь барчаллагь тIутIисса ихтилат бувна Айгун Халидовичлул.
«Алмар Каспиан» ЗАО-лул гендиректор Явуз Алайбейоглул цалва ихтилатраву барчаллагь куна проект бартдигьаврицIун кабакьу бувсса республикалул хъуниминнахь ва райондалул администрациялухь, мукунма завод буллай зий бивкIцириннахь. «Заннал ка бавкьуну ва жул захIмат Дагъусттаннангу, Турциянангу хайр-мюнпатрансса хьунтIиссар, жува ва проектрал кIилчинмур ятIап тIитIлатIисса шадлугъ дуллалисса кьинигу дучIантIиссар», — увкунни мунал. Буниялттунгу, ЦIуминалийсса агьалинан барачатсса даву хьуннав ва цIуну тIивтIусса завод. ЦIусса кIанай ххуйсса оьрму дузал хьунтIишиврийнсса умуд жувува цIакь буллалиссар уку-укунсса проектирдал. Цамур цичIав бакъахьурчагума, давур­ттив лякъин захIматсса чIумал цаппарава инсантуранссавагу зузи кIантту шаву – хъинсса дайдихьур. Барачатсса лякъиннав ва дайдихьу, цаймигу бизнес-структурардугу, инвестициярдугу кIункIу хьуннав ЦIусса миналийн. Райондалул агьалинал маэшат гьаз баву мурадрай райондалул хъуниминнал дуллалисса цинярдагу давурттацIун Занналгу ка бакьиннав!
ПатIимат Рамазанова
Андриана Аьбдуллаева