![](https://ilchi.info/wp-content/uploads/2020/07/khanbashrv.jpg)
[dropcap]В[/dropcap]ай гьантрай Москавлив ва Москавуллал областьрай хьунни «Зул гьунарду тачIавгу хъама къабитантIиссар» тIисса, Ххувшаврил 75 шинал юбилейран хас бувсса, щалвагу Аьрасатнал ихIсандалул акция. ДакIнийн бутанну, Ххувшаврил байрандалул кьинилун хас бувсса патриот акция гьашину, коронавирусрал инфекция ппив шаврицIун дархIусса тагьарданийн бувну, цила чIумал тIайла буккансса сант къархьушиву.
Имара Саидова
Гьашину ва акциялувух гьурттушинна дунни жяматийсса идарарттал вакилтурал, ветерантурал суккушиннардал, оьрчIал идарарттал, творчествалул интеллигенциялул ва журналистурал.
Дагъусттаннал чулуха ва акциялул давривух гьуртту хьунни ДР-лул Музыкантътрал союзрал правлениялул председатель,1999 шиналсса дяъвилул опполчен Хан Баширов. Шиккува кIицI лаган, тай шиннардий, ванал каялувшиндаралусса «Салам Алейкум» тIисса группа гьуртту хъанай бивкIссар госпиталлайн щавурду дирну багьминнан ва дяъвилул иширттаву талай бивкIминнан ккаккан дуллай бивкIсса концертирттавух. Му бакъассагу, ванал каялувшиву дуллалисса группа цIунцIияртту хьусса жагьилтуран оьтту буллай, шаймур буллай бивкIссар.
Ва ххуллухсса хьунабакьаврий хьунни «Искусство агрессиялийн къаршиссар» тIисса акциягу. Шиккугу цIанихсса музыкант Хан Башировлул чялишсса гьурттушинна дунни. Ванал шиккун бувкIминнайх дарчIунни сувенирду, бахшишру ва кIицI лавгунни Дагъусттан мудангу АьрасатнацIун бавкьуну ва цачIуну бикIантIишиву. Акция хас дурну дия вай гьантрай кIицI лаглагисса Дагъусттан Республикалул Конституциялул кьинилун.