Апрель зурул 8-нний оьрмулул 58 шин бартлаглагиссар Дагъусттаннал халкьуннал виричу, цинявннан бусравсса Муслим МахIаммадович Даххаевлун. Вайва гьантрай бувну бур ванал аьзизсса, дазу-зума дакъа ххирасса нину Аминатгу.

Андриана Аьбдуллаева
Муслимлул ва мудан лахъа-хъунну барча байссия. ХIайп, хIакьину ва жуятува архну ур. Къабюхълай бур ванаща, цуксса ччайнугу, цува ххирамигу, цанма ххирамигу лагма лаган бувну, ниттил кьини хъун дан, цаламур кIицI лаган.

Кьини дучIайсса духIан бюхъайнал бакIрачIанни учай­ссар. Хъисвагу щак тIий ба­къара ва кьинигу жула виричунал яхIирай лахъаншиврий,уттисса тагьарданувагу ва марцIну уккан­шиврий.
Март зуруй хьусса судрал хIукму бунни ва кIива зуруй­сса ялагу (12-мур майрайннин) дуснакьраву итан. Умуд бур ванал хIакъираву гихунмай суд­рал бувсса хIукму жува ххари бансса бикIанссар тIисса.
Щил ци тIурчагу, ци тахсир ккакларчагу, Муслим Даххаев ва кIулминнал итталу мудангу виричуну икIантIиссар.

ТачIав хъамакъабитай «Илчи» кказитрал редакциялийн хъамалу увкIсса чIумал (тачIавгу хъун къашайссия, оьвкусса чIумал га цIана учIайссия) ванал увкумур: «Ттун къаччива та-бунугу нава нанисса ккав­ккун инсан ххуллул тамур чулийн лахълай». КъалахъантIиссар, Муслим МахIаммадович! Вищал хьунаавкьуну ххари къахьунсса акъахьунссар.

Ххирасса Аминат!
ХIурмат бусса Муслим МахIаммадович!
Барча зул кьини. Цинявппагу зу ххираминнал цIания чIа тIий бура зун цIуллушиву. Зул дакIниймур ччясса чIумул мутталий бартлаганнав. Уттиния тихуннайсса цинярдагу байранну цачIу ххарину кIицI лаглан­сса каши-кьудрат дулуннав. Амин.