Дунияллул халкьуннал театрдал институтрал IХ-мур конгрессрай 1961 шинал цIакь дурну, муния мукьах гьарца шинал март зурул 27-нний кIицI лагайссар Дунияллул халкьуннал театрдал кьини.
Лайкьсса даражалий дувайссия байран 12 паччахIлугърал театр бусса Дагъусттаннайгу, цинявппа театрдал зузалтгу бавтIун,
ХIукуматрал къуллугъчитал ва культуралул министр гьурттуну.
ХьхьичIминнуха къалархьхьусса хьунни гьашинусса Театрданул кьинилул байран, COVID-19 коронавирусрал пандемия сававну, чIявусса агьлу бавтIсса мероприятияртту дуллан къадагъа дишаврийн бувну.
Хъуннасса шадлугърай кIицI къадарчагу, театрал магьирлугъ хьхьичIуннай даврил цIаний бивхьусса захIматрахлу цаппарасса актертуран Культуралул министерствалул чулухасса ХIурматрал грамотартту ва Барчаллагьрал чагъарду буллалисса батIаву хьунни ва кьини Лакрал театрдануву.
Театрданул каялувчи Бадрижат Набиевнал, актертал ва зузалт барчагу бувну, бувчIин бунни хIакьину дунияллийсса тагьар бунияла леххаву рутлатисса душиву, ца инсаннал баччибакъулшиву савав хьурча, ттуршва-азарва оьрмулун нигьачIаву душиву. Тавакъю бунни нюжмардийсса бигьалагай гьантри, билаятрал БакIчинал ккаккан бувсса куццуй, гьарцаннал цала ичIува шаппа гьан бан, бюхъайссаксса чанну кьатIушав буклан, цалассагу, чилссагу мюхчаншиву дуруччиншиврул.
Зулайхат Тахакьаева
