Жула зунттал шяраваллал инсантал бурувччуну яхъананшиврул чIарав бур полициялул вакилтал. Вайннайн жува участковыйтал учару.

Ккуллал райондалийсса шяраваллаву инсантурал оьрмурду буруччаврил ялув бавцIуминная бувсуна ттухь МО полициялул майор Илияс Къушиевлул:
— Участковыйтал буссар циняв шяраваллаву. Вихьуллал ва Ссухъиящиял шяраву уссар Рамазанов Аскандар, ЦIуйшав, Хъювхъав, Къянив – Гъазиев Аьвдулрамазан, Хъусрахь – ХIаммакуев Рамазан, Ккулув – Чаринов Ширвани ва Рабаданов Оьмахан, кIивагу ЦIувкIрав, ЦIущарнив, СумбатIлив – Кьурбанов Бадави, Ваччав – Чупанов Альберт, ЧIяв, Хъюй – ЯхIияев Назим.
Вайннал итникьини, ар­вахIкьини, ххуллункьини шяраваллал администрациярттал къатраву кьунниялай ссят ряххунния мяйра хьуннин кьамул байссар цала масъалар­ттащал бувкIсса инсантал. Ккуллал шяраву, ца нюжмаркьини ли­чIаннин, гайми ряхрагу кьини инсантал кьамул бувайссар. Амма, иш багьни, вай жяматрал чIарав буссар муданмагу. Дуллай бур лайкьну цала даву ккаккан дурсса кьяйдардай.