[dropcap]В[/dropcap]ай гьантрай МахIачкъалалив хьунни Республикалул Культуралул министерствалучIасса Аьрасатнал халкьуннал аслийсса культуралул центрдал даврил
координациялулсса бувайсса советрал батIаву. Му хьунни «Культуралул ламурду. Аьдатру ва ттизамана» тIисса цIанилу. Му дачин дурну бия ДР-лул культуралул министр Зарема Буттаева.
Бадрижамал Аьлиева
[dropcap]Б[/dropcap]атIаврий ххал бигьлай бия «Культура» тIисса цIанилусса национал проектрал лагрулийсса давурттацIун бавхIусса масъалартту, «Дагъусттан Республикалий культура хьхьичIуннай даву» тIисса цIанилусса паччахIлугърал программалул лагрулий дуллалими ва цаймигу давуртту, ялун нанисса чIумуву дуванмунил планну. Ялату нанисса шин Театрданул шинну баян бувну буссия, ЮНЕСКО-лул тIурча, вара шин баян бувна бикIлил халкьуннал (коренных народов) шинну. Мунийн бувну ва шинал хъинну чIярусса культуралул давуртту дурссар, щаллу дурссар личIи-личIисса проектру.
Халкьуннал творчествалуцIун, халкьуннал театрдацIун дархIуну дурми давурттая, мероприятиярттая гьарта-гьарзасса ихтилат бувна ДР-лул культуралул министрнал хъиривчу, РДНТ-лул директор Марита МухIадовал.
Шинал лажиндарай хьхьичIун ливчусса культуралул зузалтран ва идарарттан дуллунни ДР-лул Культуралул министерствалул чулухасса наградартту. Ми ларсминнавух бия Каспийск шагьрулийсса Аьрасатнал Халкьуннал аслийсса культуралул центрданул директор Башикар Гадаевагу.
