Ларгсса нюжмардий Лакрал райондалий миллатрал Виричу Хан-Муртазааьлил гьайкалданучIа хьунни Лакрал ва Ккуллал районнал жагьилтал аьралуннаву къуллугъ буллан тIайла буклакисса шадлугъ. Жагьилтурахь ххуллухъин учин бувкIун бия Лакрал райондалул администрациялул бакIчинал хъиривчу
Юсуп Рамазанов, КIулшиву дулаврил управлениялул каялувчи Явсупи ХIамзаев, ОьрчIащалсса ва жагьилтуращалсса даврил отделданул каялувчи МахIаммад Гадаев, райондалул Ветерантурал советрал хъунама Сулайман ХIажиев, Гъумучиял лицейрал директор МахIаммад Хъунбуттаев, Ккурккуллал школалул директор Даниял Магьдиев, Ккуллал райондалул администрациялул бакIчинал маслихIатчи Щамххал Хизриев, аьралуннаву къуллугъ буллалиминнал нину-ппу, гъан-маччами.

Зулайхат Тахакьаева
Шадлугъ тIитIлай, Лакрал ва Ккуллал районнал аьрали комиссариатрал отделданул каялувчи Ажуб Юсуповлул бувсуна гьашинусса интнил призывраву кIирагу райондалия аьралуннаву къуллугъ буллан тIайла уклай ушиву 15 жагьил.
КIирагу райондалул аьрали комиссар ХIасан Массуевлул цалва ихтилатраву, цIанасса армия ттизаманнул армия бушиву кIицI лаглай, чIа увкуна заманалул тIалавшиннардацIун бавкьуну бурж лахъансса тIайлабацIу.
Лакрал райондалул бакIдургьу­миннал цIания аьралуннаву къуллугъ бан наниминнахь ххуллухъин тIий, Юсуп Рамазановлул кIицI лавгуна щалла дуниял зурзу тIутIи дурсса къажарнал Надир-шагьнал хъунмасса аьралуннащалсса талатавриву Дагъусттаннал халкьуннал цачIун дур кьюкьлул бакIрай ивкIсса Хан-Муртазааьлил гьайкалданучIату тIайла буккаврил хъуннасса мяъна душиву.
— Вай гьантрай жулва билаятрай лахъа-хъунну дунни немецнал душманнащалсса дяъвилуву Бюх­ттулсса Ххувшаву ларсун 70 шин там шаврил юбилейран хас дурсса парад. Жунма чIалай бур, иш бавчусса Западрал билаятирттал Аьрасатгу, Дагъусттангу бурусин, жунма къачIалачIисса цIансса гужру ишла буллай бушиву. Ми гужирдал ясир буллай бур жулва жагьилталгу. Щалла аьрщи щарай дур. ХIакьину Украиннавусса тагьар гьарцаннан чIалай дур. Ва аьратталсса чIумуву зуй, ватан дуруччин тIайла буклакиминнай, хъуннасса жаваблувшинна дуссар, — увкуна ванал.
Аьралуннаву къуллугъ буллан тIайла буклакиминнайх бавчIуна уттигъанну Лакрал райондалул администрациялул Ххувшаврил 70 шин там хъанахъисса юбилейрал хьунийн итабавкьусса Хъун дяъвилий вирттаврал цIуртти лавсъсса лакран хас бувсса буклетру.
Хъирив Щамххал Хизриевлул увкуна:
— АцIрахъул шинал хьхьичI аьра­луннаву къуллугъ бан махъаллил хъанай бивкIхьурчагу, хIакьину билаятрай аьралуннал сий, Совет заманнай кунна, хъунна хъанай дур, билаятрал бакIдургьуминнал аьралуннахсса къулагъасгу ххи хъанай дур. Западрал цаппарасса билаятирттал мазурдиву бувагу бакъассар «дус», «гьалмахчу» тIисса махъру, ми мукъурттин кIанттай тайнначIа ишлану буссар «партнер», «компаньон» тIисса махъру. Тайнная дустал бангу тачIав къашайссар. Тайннал бусса хIарачат дунияллул заллухъру цивппа хьунсса бур. Амма ва Ххувшаврил парадрай Аьрасатнал ккаккан бунни цила кьуват. Нигьай бакъа къабакьайсса билаятрур тай. Мунияту жунма аьркинну бур цIакьсса армия. Армия цIакь хьунтIиссар, агар зугу, зу кунмасса жагьилтуралгу зуйва бивхьусса бурж лажин кIялану биттур булларча. Цуксса жунма баян къатIааьннугу, кIицI къабувну къахьунссар, щиячIав кьюлтIсса иш бакъар, цаппарасса жулва жагьилтал аьралуннаву къуллугъ буллалисса кIанттай кIанчIлин ликлай, лайкь дакъасса тIуллу дуллай, яла ми ишру, ваца хъунмасса гьунар бувсса кунма, интернетравугу бихьлай, щалва Дагъусттаннал цIа кьюкьин дуллалисса кIанттурду хьунабакьлай бушиву. Аьралуннаву низам цIакьсса дуссар, дикIангу аьркинссар. Зугу та низам дуруччин буржлувссару. Интернетравугу лайкьсса тIуллур ккаккан дан аьркинсса. ДухIин дакъасса тIул дан ца лахIза гьассар, ххуйсса цIа лайкь дан оьрмугума биял къашайссар. Ча, хъамамабитару зуйвасса бурж. Лаккучунал цIа ххуйчулий дакъа, оьккичулий ккаккан мадару.
Явсупи ХIамзаевлул кIицI лав­гуна Хъун дяъвилий 7 лаккучу лайкь хьушиву Виричунал цIардан: 5 — Совет Союзрал, ца — Италиянал, цагу — Франциянал. ЧIа увкуна вай вирттаврал цIардан лайкьну бурж лавхъун зана шаву.
Даниял Магьдиевлул увкуна:
— 70 шинал хьхьичI Совет аьра­луннал ххит увссар Гитлер. Зун цучIав ххит уллан къабагьаннав, амма иш багьарча, ппухълуннал чувшиву ккаккан дансса кьуват зучIа лякъиннав! Нинугу цар ду­сса, ватангу цар дусса! Зул ватан – Лакку улчар, Дагъусттанни, Аьрасатри. Зува ласайсса ша хьхьичIва-хьхьичI нину дакIнийну, яла ватан дакIнийну лалусияра!
Аьралуннаву къуллугъ бан наниминнахь насихIатрал махъру ялагу увкуна МахIаммад Гадаевлул, цала гъанчу тIайла уккан МахIачкъалалия увкIсса Дагъус­ттаннал лайкь хьусса артист ХIаммад Макьсудовлул, арс тIайла уккан увкIсса «Ххяххабаргъ» кказитрал редактор Мусалав Мусалаевлул, Билалова КIукIул. Аьралуннаву къуллугъ буллан наниминнал цIания цивппа тIайла буккан бувкIминнахь барчаллагь увкуна Хьуриятусса МахIаммадов Аьбдуллагьлул.