Ноябрьданул 24-нний МахIачкъалалив Культуралул дворецраву шадлугърал тагьарданий тIиртIунни «Гордость Дагестана» конкурс. Ва хъанай дур Республикалул БакIчи Рамазан
АьбдуллатIиповлул бахшиширттансса, гьунар бусса оьрчIал дянивсса телевизион конкурс.
Бадрижамал Аьлиева
«Гордость Дагестана» конкурсрал сакиншинначитал бур ДР-лул Культуралул министерство, Печатьрал ва информациялул министерство, МахIачкъала шагьрулул администрация, шагьрулул Культуралул управление, КIулшиву дулаврил управление, «Дагъусттан» ВГТРК.
Конкурс тIитIлатIисса шадлугъ дайдирхьунни МахIачкъалаллал 2-мур школа-искусствалул оьрчIал ва чIаважагьилтурал «Дети Кавказа» ансамбльданул ва «Хореография» номинациялуву гьуртту хъанахъисса творчествалул коллективирттал. Миннал щаллу дунни Дагъусттаннал ттугълин хасъсса хореографиялул композиция «Триколор».
Конкурсравух гьуртту хъанахъиминнахь чабувкру тIисса махъ лавхъунни ДР-лул культуралул министрнал хъиривчу Мурад ХIажиевлул, МахIачкъала шагьрулул бакIчинал цалчинма хъиривчу Запир Алхасовлул, ДР-лул Печатьрал ва информациялул министерствалул информациялул ва аналитикалул управлениялул хъунмур Елена ТIагьировал.
«Гордость Дагестана» конкурсрал агьамми мурадру бур гьунар бусса оьрчIру ялун личин баву ва миннал чIаравбацIаву даву, балай учаврил искусствалул личIи-личIисса журарду хьхьичIунмай ва машгьур баву, дунияллул музыкалул культуралухух оьрчIру гьан баву, миннаву художествалул тIин-тIааьн бишаву ва сахIналул культура хIасул даву, миннаву чIявусса инсантурал хьхьичIун буккаврил опыт ххи баву.
Конкурсравух гьуртту хъанай бур республикалул циняв районнаясса ва шагьрурдаясса чIава балайчитал ва творчествалул коллективру. Лакрал районнаями оьрчIру кIул бувну, гихунмай минная гьарта-гьарзану чичинссар.
Конкурс хъанай дур 4 номинациялий: «Хореографическое творчество»; «Вокальное исполнительство»; «Инструментальное исполнительство»; «Оригинальный жанр» (циркирал жанрду, декламация ва м.ц.).
ОьрчIал гьунардан кьимат бишлантIиссар МахIачкъала шагьрулул Культуралул управлениялул начальник Фарид Абалаевлуя, «Дагъусттан» ВГТРК-лул директорнал хъиривчу Ссалам Хавчаевлуя, ДР-лул Печатьрал ва информациялул министерствалул информациялул ва аналитикалул управлениялул начальник Елена ТIагьировая ва цайминная сакин хьусса жюрилул.
Конкурс къуртал хьунтIиссар декабрьданул 25-нний гала-концертрайну. Конкурсрал дневник ккаккан буллантIиссар «Дагъусттан» ВГТРК-лий.
