Брянскаллал аьрщарай талай бивкIсса Дагъусттаннаясса азарахъул вирттаврава чIявуссаннал оьхIалсса душмантуращал талай жанну харж дурссар. Совет аьралуннал аьпа абад буллай 2013 шинал Брянскаллал областьрайсса Севск тIисса шагьрулий Буйнакскаллал райондалул администрациялул цала чулухасса гьайкал дацIан дурссар.
Шикку лухIисса мармарчарил улттуй чирчуну дуссар сайки 400-ксса дагъусттанлувнал цIа-бакI. Гьайкал дацIан давриву ва ганиннин ятIа-тIар бакъа бакъа хьуминнавух бивкIсса жулва аьра­лийтурал цIа-бакI ххал дуллай хъунмасса захIмат бивхьуссар Буйнакскаллал райондалул токсовцынал.

Ца ппурттуву жул Эрпелилив­сса школалул токсовцынал электрон адресрайн Севскалийсса жул дустал-поисковиктурая бувкIун бия укун­сса мяъна-мурадрал чагъар: «Жул «КIяла кьурукьру» гьайкалданучIан уттигъанну бувкIун бия шикку аьпалул хьусса, 3-сса архнийн битавуртту дувайсса Гвардейский авиаполкрал капитан, цувгу 1916 шинал увсса Исмяил Шахшаевлул уссурссу. Ва лехлай ивкIун ур Ил-4 самолетрай. Ва къуллугъ буллай ивкIсса полкгу бивкIссар Верховный Главнокомандующийнал итталусса Брянскаллал корпусрал 2-сса гвардейский полк. 1943 шинал июльданий капитан Шахшаевлун дуллуну диркIун дур «За оборону Сталинграда» тIисса медаль. Цувагу ур Лакрал райондалийсса Кунайли (чагъарданий чивчусса куццуй) тIисса шярава. Нину – Шахшаева Рукьижат Аьбдул-Гъапуровна», тIий чивчусса.
Чагъарданул ахирданий бия, зунма цикIуй кIул хьурча ваная гихунмай, тавакъюри баян баву, тIий.
Боевой Славалул музейраву батIайсса Буйнакскаллал райондалийсса ТОКС-рал штабрай ва ча­гъар ххалбивгьуну махъ, штабрал амрулийну, Эрпелиллал школалул поисковиктал летчик Исмяил Шахшаевлул хъирив бивзссар.
Хъинну тарихгу кIулсса, укун­сса давурттахун хъунмасса гъираращал агьайсса Хайбулла Хайбуллаевлул каялувшиннаралу оьрчIру булувкьуну бия летчикная ци кIул бан шайрив ххал буллай. Вайннал хIарачатрайну жун тIиртIуна Хъун дяъвилул тарихрал цIусса чувшивуртту. Исмяил Шахшаевлуя вайннал кIул бувну бия 1937 шинал ва дуклан увххун ивкIшиву Краснодардал авиациялул училищалувун. Му къуртал бувну махъ, 1940 шинал, Прибалтиканаву аьрали къуллугърай ивкIшиву. Му чIумал байбивхьуну бур дяъвигу. Исмяил ккаллийну ивкIун ур ца яла хьхьичIунма пишакарнан, архмур авиациялул полкрал штурманну ивкIун ур. ЛичIи-личIисса къуллугъирттай, жаваблувсса амрурду биттур буллай ивкIун ур дяъвилий талатиссаксса хIаллай.
Цалчинсса ЯтIул ЦIукул орден ванан дуллуну диркIун дур 1942 шинал июньдалул 20-нний, кIилчинсса ЯтIул ЦIукул орденгу мура шинал июльданий дуллуну дур. Жул токсовцынал мукунма Исмяиллуя кIул бувну бия ванал экипажрал махъра-махъсса ссавруннайсса талатавриягу. Ванащал ивкIсса кIия ххассал хьуну ивкIшиву ва цува кIидурхъун дагьну нанисса бомбардировщик­рал ца отсекраву ливчIун ганищал архIал пIякь увкушиву.
Жула къучагъсса ватанлувнал цIа чирчуну дуссар Брянскаллал областьрайсса Севск шагьрулийсса «КIяла кьурукьру» тIисса гьайкалданул мемориал улттуй.
Гьар шинах Ххувшаврил кьини, Севск душманная мурахас був­сса кьини ва Брянскаллал область фашистътурацIа марцI дурсса кьини гьайкалданучIа батIайссар шиччаллил дуклаки оьрчIру, студентътал, пограничниктал ва тийх ялапар хъанахъисса жула ватанлувтал. Вайннал вирттаврая дакIнийхтунусса аьпалул махъру-ихтилатру бувну, цIунилгу вайннал рухIру ххари дувайссар. ГьайкалданучIа такIуй чан къашайссар сагъсса тIутIал кацIру ва гьар байраннай ши­кку хIурматрал къарал бавцIуну бикIайссар. БучIайссар шиккун Севскаллал ТОКС-рал гьурттучиталгу, вайннал маслихIатчиталгу. Вана укунсса аякьа-ургъилданулу буссар Брянщиналий жула вирттаврал чувшивурттал аьпа.
Аьбдулла МахIаммадов,
Буйнакскаллал Боевой Славалул музейрал хъунама, райондалул
ТОКС-рал штабрал командир