ЦIуссалакрал райондалул администрациялий Ухссавнил территориал округрайсса Дагъусттаннал БакIчинал полпред Вячеслав Паламарчуклул кьамул бунни агьали. Микку гьуртту хьунни ЦIуссалакрал райондалул администрациялул бакIчи ХIажи Айдиев, ДР-лул Халкьуннал Мажлисрал депутат Зайнуллагь Мирзоев, ДР-лул Миллатирттал политикалул министрнал цалчинма хъиривчу Гьарун Давидов, Бизан баврицIун бавхIусса масъалартталсса байсса управлениялул хъунама ХIасан Акаев, Ухссавнил территориал округрайсса Дагъусттаннал БакIчинал полпреднал кумагчи Эльдар Дунакаев ва цаймигу.
Паламарчуклул кьамул бунни лакрал, чачаннал ва яруссаннал миллатирттал агьали, цинявннан цачIусса масъалартту ххалбигьин бувкIсса. Бия миннавух цайва-цайва бавцIуну щаллу бан аьркинсса масъаларттащал бувкIсса агьалигу. ХъунмурчIин шикку гьаз буллалисса масъалартту бия Чачаннал районгу цIудуккан дурну, лак цIусса миналийн бизан баврицIун бавхIусса.
Бия къатри дувансса аьрщи итадакьаву тIалав буллалисса ТIюхчардал шяравасса делегация. ЦIусса миналийсса цIусса къатравун бизан бувминнал шийхсса къатри зана битаврицIун бавхIусса суаллу буллай бия чачаннал миллатрал чулухасса делегация. Ва приемрайсса агьалинал чулухасса масъаларттах вичIигудирхьуну, бувсунни ми дузал бансса куцгу.
ЦIуминалийн бивзсса агьалинал къатри зана къабитаврил савав миннухсса компенсациярду букъаллай, лахъи лаган баврицIун бавхIуну бушиву бувчIин бунни ХIасан Акаевлул. Вай масъалартту ххалгубивгьуну, вайннуйн бувсса хIукмурду кьамул бантIиссар ДР-лул ХIукуматрал председательнал хъиривчугу гьурттуну дантIисса комиссиялул заседаниялий.
Вячеслав Паламарчуклул ва приемрай кьамул унни 60-хъул инсан.
