ГьунчIукьатIрал шяраву хIа­дур хъа­най бур аьраличалт­ран хас бувсса аллеялий мурхьру бугьан.
Шяравун биян бувну бур мурхь­ру, миннул лагма чапар дан­сса арматура ва муххал кIунурду. Бихьлай бур мурхьирдацIун щин дуцай пластикрал турбарду, 400-ннийн бивсса мурхьру бугьансса хъунтIуллал дачIи дурккун дур.

Лакрал бур: «Виричу ивчIай­ссар, цIа личIайссар», тIисса ххаллилсса учала. Жула бутта­хъал лайкьсса ирс жувагу тапшур бан аьркинссар хъиривсса никирайн. Тавакъю буллай буру ГьунчIукьатIрал жяматрахь, чя­­лиш­ну гьуртту хъанахъи вай чи­рилунсса давурттавух.
Шяраву бакъассар цавагу къатта-къуш, цавагу кулпат, Хъун дяъвилул талатавурттавух гъанчу гьуртту къавхьусса. Къабавнангу баян бувара жура дуллалисса даврия, яла жуйра аьй-бювкьу къадуллан, баян къабувунни тIий.
ХIурмат бусса лакрал, Гьун­чIу­кьатIрал, КIямаш­рал жямат!

Апрельданул 6-нний, ссят 10-нний, ГьунчIукьатIрал шяраву, Буттал кIанттул цIанийсса Хъун дяъвилий ххувшаву ларсун 75 шинал юбилейран хасну, «Славалул аллеялул» гьану бизлазиссар. ГьунчIукьатIрал ва КIямашрал шяравасса гьарцагу дяъвилул гьурттучинал цIанийсса мурхьру бугьантIиссар.
Бухьхьияра ва чирилун дуллалисса даву хъун дан.
«Возрождение Унчукатля» ккурандалул правление