Щаллагу дунияллул Поэзиялул кьинилул гьантрай ДГУ-лул филологиялул факультетрай хьунни машгьурсса шаэр МахIаммад-Загьид Аминовлул поэзиялун хас бувсса мажлис.

И. Саидова
Шаэрнал поэзиялул вечерданул программа сакин дурну дия АьФ-лул ва ДР-лул Халкьуннал артист, АьФ-лул ва ДР-лул ПаччахIлугърал премиярттал лауреат,
композитор Ширвани Чаллаевлул, ДР-лул Халкьуннал артистка Лариса ХIажиевал, ПаччахIлугърал Думалул депутат Ризван Кьурбановлул кумагчи, Аьрасатнал Чичултрал союзрал Дагъусттаннал отделениялул хъунмур, шаэр, публицист Миясат Муслимовал, МахIаммад-Загьид Аминовлул поэзия ххирасса, дакIних кIулсса Щардал школалул учитель АьвдулхIалим АьвдулхIалимовлул ва шаэрнал душ, филологиялул элмурдал кандидат Хазина Аминовал.
МахIаммад-Загьид Аминовлул поэзиялун хас бувсса мажлис тIитIлай, ванал пасихIсса творчествалия бувсуна Миясат Муслимовал.
— ХIакьину жува цачIун був­ссару дакI ххари дайсса поэзиялул байрандалул. 1999 шинал ЮНЕСКО-лул баян бувссар март зурул 21-сса кьини Щаллагу дунияллул поэзиялул кьинину. Ва байрандалул гьантрай жунна сант дагьунни Дагъусттаннал литературалул поэзиялувасса ххаллилсса лажин тIитIинсса, гьунар бусса, ххишала акъа машгьурсса шаэр, прозаик, таржумачи МахIаммад-Загьид Аминовлул ххаллилсса творчествалущал кIул хьунсса.
Шаэртурал шеърирду ккалан аьркинссару жува канища щяв къабишайсса чIюнну кунма, цанчирча гьарицагу шеърилуву буну тIий жулва поэзиялул ххазина. Шаэр шеърирдаву дихьлай ур Ватандалул дард-ххажалат, пикри-хиял, талихI-тирхханну. ХIасил, шеърирдаву шаэр уссар дакIнива нанимур мукъурттийну аьч буллай.
МахIаммад-Загьид Аминовлул поэзиялул мажлис бачин бувну ия цува Ширвани Чаллаев. Шаэрнаясса цалва мукъуву ванал куна:
— МахIаммад-Загьид Аминовлул поэзия ххирар ттун цанна хасъсса аслийсса культура ду­сса буну тIий. На цимилгу тик­рал бара, цIанагу тIий ура, агана аьрщарай цува ца шаэр акъа, ягу цайми шаэртурал поэзия ттунма къакIулну бивкIссаниягу, так ца МахIаммад-Загьид Аминовлул поэзия гьа хьунссия ттун бусса оьр­мулий шеърирдая неъмат ласун, миннуя щалиххан. Ванал поэзиялул, творчествалул ттул дакIнивун гьавас бутай, ххарисса асарду биян бай. МахIаммад-Загьид Аминовлул шеърирдачIан макьанну цирда дачай, образру цирда хIасул шай. Шаэрнал цикссагу шеърирду таржума бувну бур оьрус мазрайн. Амма, ниттил мазрай кунма бюхханну, асар хьунну къаличIай шеърирду таржума бувну махъ.
МахIаммад-Загьид Аминов ччяни дунияллия лавгунни. Ца­ла ххаллилсса, авадансса поэзиялийну ва хIакьинусса кьинигу халкьуннал дакIурдива тачIав къагьантIиссар. МахIаммад-Загьидлул поэзия ххирасса инсантал лакрал миллатраву чIявусса бур. МахIаммад-За­гьид­лул поэзиялух эшкьи хьу­сса, ванал щалла творчество дакIних кIулсса Щардал школалул учитель АьвдулхIалим АьвдулхIалимовлул шаэрнал поэзиялун хас бувсса мажлисрай хьура нагу. АьвдулхIалимлучIа шаэрналгу, ванал поэзиялулгу хIурмат-кьимат муксса лавай­сса бурхха, шаэрнал бакIраву хIасул хьуну бивкIсса, чичин бувасса шеърирдугума кIулсса ххай ура ванан. На навагу хIайп тIун икIара циванни нава уттинин ттула ниттил мазрай опера къачивчусса тIий. МахIаммад-Загьидлул поэзиялуву опера чичинсса цикссагу шеърирду бур…
Щала вечер наниссаксса хIаллай Ширвани Чаллаев ия шаэрнал назмурду ккалай, къабувчIлачIиминнан бувчIин, миккура таржума дуллай, архIала ми шаэрнал мукъурттий халкьуннал макьаннай балайрду тIий.
Ва дия мяйжаннугусса поэзиялул ва ниттил мазрал байран.
БавтIминнан ххаллилсса бахшишну хьунни ва мажлисрай цIа дурксса Дагъусттаннал балайчи Лариса ХIажиевагу гьуртту шаву. Цинявппагу мякь къалиххавай, вичIилий бия МахIаммад-Загьидлул мукъурттий Лариса ХIажиевал тIутIисса балайрдах.
Цинявппа студентътал бия дунияллийх цIа дурксса композиторнащал ва цIанихсса балайчинащал дакIний личIансса суратру ришлай.
АьвдулхIалим АьвдулхIа­лимовлул бюхханну, пасихIну, дакIних бувккунни шаэрнал тамансса шеърирду.
— МахIаммад-Загьид Аминов ттул кумирди. На мунал творчествалий хъуна хьуссара, хIакьинусса кьинигу му лахьлайна уссара. МахIаммад-Загьид ия чIиви оьрчI куна марцIсса инсан. Ва Заннала шеърирду чичлан ляхъан увну ия, — увкунни ванал.
— Хъунмасса хIалли укун бюх­ттулсса даражалул искусствалул байран къаккарккун. Шаэрнал поэзиялун хас бувсса мажлис кIура бавунни ниттил мазрал, буттал улк­лухсса ччаврил байрандалийн, — укунсса мукъурттий къуртал бувна шадлугърал мажлис Миясат Муслимовал.