КIинт – барчаллагь, инт – ча дуркра!
ТIабиаьтрал мукьра чIумува инсаннан яла чIа тIимур чIун хъанай дур, кIинтнихь барчаллагь, интнихь ча дуркра тIисса чIун. Интдайдихьулул кьини дучIан хьхьичI шанма гьантлий лув-ялув буллай бия марххала.
Амма мартрал 21-мур кьини дарусса, баргъ бивтсса, гъилисса интнил кьини хьуна. Мунияту хъиннува гъирарай хьунадакьин бювхъуна интнил хьхьу.
[dropcap]Р[/dropcap]айондалийсса циняв шяраваллал культуралул зузалт, шяраваллал вакилтал, школарттал дуклаки оьрчIру бувкIун бия байрандалийн, лакку дукрардугу дурну, миллатрал личIи-личIисса лаххиярттаву. Гьай-гьай, цинявгу янилун багьанну бия ххуйшиврул чулуха. Шадлугъ дачин дурну ия исвагьийсса чиллу-чухъравусса Хъусращиял шяраваллил халкьуннал театрданул режиссер Марсел Сулайманов. Цалчин сахIналийн бувккуна Хъюйннал коллектив. Вайннал хъирив – Хъусращиял, Вихьуллал, СумбатIуллал, Хъювхъиял, ЦIущуллал, Къяннал, Ккуллал, 1-мур ЦIувкIуллал, ЧIяйннал, Ссухъиящиял, ЦIуйшиял ва Ваччиял.
[dropcap]В[/dropcap]айннал ккаккан дуруна интнил кьинирдай цала-цала шяраваллал дайсса аьдатру: буцай душничIан ссахI бичин, янна-ка диян дан лагайсса, ттурландалул мархха хьхьувай ххуй душнил кIараллилу биширча, гьалмагъай макIра ккаккайсса, жагьилнал урундалул тIурби дагьсса къатравасса буцай душ бакIрайн багьайшиву бусласисса ва цаймигу чIярусса аьдатру.
Увкуна интнин хас бувсса балайрду, дурккуна чIярусса саннарду. Лях-карах культуралул зузалт щаллу буллай бия балайрдугу. Хьуна мукунма жагьилтурал дянивсса тIуркIурдугу.
