Москавливсса Интнил хьхьунил биян бувсса асарду
«Дагъусттан» Культуралул центрданул Интнил хьхьунил байран, Москавливсса ва лагма-ялттусса шагьрурдайсса дагъусттанлувтурайнгу оьвкуну,
цачIу дуваву махъсса шиннардий цIакь хьусса аьдат дур. Гьашинумур байран дия «Дизайн холл» тIисса ресторандалуву март зурул 23-нний. ХIадур дурнугу дия Культуралул центрданул ва Мариян Илиясовал цIанийсса «Дараччи» фондрал Москавливсса филиалданул уртакьну.
Байран дувантIисса ресторандалучIан бияйхту, ттунма цалчин ккавкми душругу Гульшан ва Тарият хьуна. Цивппагу, чалагъайрдугу дирчуну, ца бювхъуну чIалай бия. Дагъусттаннай аьдатрайсса ишну чIаларчагу, тамаша бизлайгу бия, кIулсса ва бувагу къакIулсса инсантал гъан хъанай, байран барча дуллай, хъямаларду багьлай, аьчухну ихтилатру буллай бушиврия. ЛичIинува тIааьнну бия билаятрал хъуншагьрулийсса агьалинал ниттил мазрайсса ихтилатирттах вичIи дишингу.
Байрандалийн бавтIми барча буллалисса цала мукъуву «Дагъусттан» Культуралул центрдалул президент Арсен ХIусайновлул кIицI лавгуна жува ялун нанисса никирангу ядуллан аьркиншиву рувхIанийсса мяъна дусса, жула халкьунналгу, аьмну машрикьуллал халкьунналгу тарихраву цIакь хьусса байранну, миннувух – Интнил хьхьунил байрангу.
Столлай, хьхьахьхьарттая тIайла хьуну, дия лакку дукрарду. МахIачкъалалия байран чIюлу дан бувкIсса балайчитурал Карин Кьадинаевлул ва Жамила Аьбдуллаевал балайрду залданувуцириннан малхIанну бия, залданувуми ва балайчитал хIала бувххунгу увкуна лакрал халкьуннал балайрду.
Мажлис бачин бувну ия гьунар бусса артист Ислам ИсабахIандов. КъавтIавурттал хъар ларсун дия «Аьдат» тIисса ансамбль.
НахIуя байрандалийсса ихтилатру. Миллатрал цIа-кьини, культура, аьдатру кьадрулий ядуллан аьркиншиврия. Хъунисса шагьрурдай кувннал кув бувгьуну, чин эбратну къуццу тIун аьркиншиврия. Байрандалул агьлу тяхъа буван аукциондалий бавххуна нукIузаманнул гунгуми ва Мариян Ибрагьимовал произведениярттал 15 том. Увккуна 34 азарда къурушран 15 том ласунсса багьадура. Вагу Мариян Ибрагьимовал луттирду ххирану бушиву исват буллалисса аьшри.
Профессор, цалчинмур ранграл капитан Аьлиев ХIусман-ХIажинал цалвамур ихтилатраву барчаллагь баян бувна лакку мазгу, культурагу ядуван хъунмасса хIарачат буллалисса «Илчи» кказитрал зузалтрайнгу, «Дараччи» фондрал вакилтурайнгу, байран лайкьсса даражалий дуваншиврул хъунмасса захIмат бивхьусса Москавливсса «Дараччилул» филиалданул хъунмур Мариян Кьаландаровайнгу ва ванил урчIака БатIи Оьмаровайнгу. Мариян Кьаландаровал цилвагу бувуна та ххуй-хъиншиврул байрандалуцIун бавхIусса ихтилат. Мунищала архIал баян бувна та интнил мажлис щаллу шаврил ххуллий чIарав бавцIусса, спонсоршиврийсса ка-кумаг бувсса инсантурал цIардугу. Миннавух бия: АО «Калибр» тIисса фирмалул гендиректор Расул Кьаландаров; хирург- стоматолог Астемир Шайхаьлиев; ООО «Восход-Метиз» фирмалул директор Ибрагьим Гьарунов, «Солист» стоматологиялул каялувчитал Ризван ва Светлана Илдаровхъул. Столлай дишинсса нахIу-нацIу гьан дурну дия Рамазан Абакаровлул («Баттерфляй»), щин диян дурну дия бизнесмен Сергей Давдиевлул, МахIачкъалаливсса «Инт» этно-кафелул цалла чулуха ссайгъатран тIайла дурккун дия бартри. Байрандалий хьхьичIунсса гьурттушинна дурминнангу, спонсортурангу буллуна Москавуллал Культуралул центрданул чулухасса Барчаллагьрал чагъарду. Гульшан Хасаеващал ва Тарият Къапиеващал ттунгу буллуна Барчаллагьрал чагъар. Вагу жула кказитрал даву тихсса Дагъусттаннал диаспоралун бусравну душиврул барашиннар.
Махъсса шиннардий байраннахгу, чIявусса цайми затирттахгу бахханану буруглагиссагу бур, ай, ми бусурманнал байранну дакъар, къабучIиссар, къадагъассар тIисса нагъиллу ккалаккисса «аькьлукартал» чан бакъар. 2009 шинал ЮНЕСКО-лулгума Интнил хьхьунил байран дунияллул кьиматрайсса ирс-ххазиналул сияхIрайн ларсун дуссар, ООН-далулгу мартрал 21-мур кьини щаллагу дунияллул халкьуннал лагрулийсса байраншиврий цIакь дурну дуссар. Буттал буттахъая шиннай кьадрулий ва кьиматрай диркIсса байран агьалинал дакIурдива дуккан дуван къашайссар, дуллан щихьчIав ихтияр дакъассар. Му зат исват бунни Москавливсса Интнил хьхьунил байрандалулгу.
«ОьрчI заманнайра яла ххирамур байранъя ва ттун, хIакьинугу лавгзамана итталу бавцIунни, укунсса байраннугу, аьдатругу жула лавгмунищалсса дахIаврил ххал дуцан къаритлатисса давурттиври, вай якъадурну чара бакъассар», — тIий бия КIундиясса 80 шинавусса ПатIимат Мусиева. Татарнал миллатрал душ, Совет Союзрал кIийла Виричу АхIмад-Хан Султаннул ссурахъу, Алла Аппазовагу (Дагъусттаннал диаспоралул дуллалисса давурттай ва байраннай муданмасса хъамалудушри) бия, шиная шинайн ярг хъанай дур байран, дияча ца алжаннул хьхьу тIий…Укун тIутIими хъинну чIявусса бия.
