Шяраваллил хозяйствалул кьинилун хасну (октябрьданул 12-нний) октябрьданул 11-нний Ваччиял шяравусса майданнив хьунни къурату дучIан дурсса бакIлахъиялул ярмукIа.

Муний гьуртту хьунни Ккуллал райондалул шяраваллал СКР-ду, КФХ-ду ва таксса ЛПХ-дал вакилтал. ЯрмукIалий дахлай бия дикI, нагь-нис, нувщи, калан, къур, ницI ва цаймигу бакIлахъия. Бия дахлай янна-усгу. Ккуллал райондалул Шяраваллал хозяйствардал управлениялул хъунама Рамазанов Рустамлул бувсуна ярмукIалий гьуртту хьусса циняв даххулт Ккуллал райондалиясса бушиву.
ЯрмукIалийсса багьри укун­сса бия: дикI –  180-200 къ., нувщи-къур – 18 къ.,калан – 12 къ., нис – 160 къ., нагь – 500 къ., ницI – 700 къ.. Бия, мукунма, сагъсса ятту-гъаттара бахлахисса ва ласласиссагу. ЯрмукIалия даххулт ва ласулт рязину ливчIунни.