![](http://ilchi.beget.tech/wp-content/uploads/2019/06/wdweda3433.jpg)
Ккулату Закаталлайн, Ттуплислив бияннин
[dropcap]Н[/dropcap]а школалий дуклакийни, улча лахьхьаврил даву хъинну ххуйну дачин дурну дикIайва Ккуллал 1-мур школалий.
[dropcap]В[/dropcap]а даврил яла ца яла хьхьичIунсса сакиншинначинугу икIайва Хъун дяъвилул гьурттучи, тарихрал дарсирал учитель Оьмаров Аьли Оьмардул арс. Мукунна улча лахьхьаврицIун дархIусса давуртту дувайва Кьурбанов МахIаммадлул ва, МахIаммадов Асланнулгу. Яла махъ ва даву шавкьирай дачин дурну най буссияв жугу, вайннал учениктал – нагу, Мамаев Аллари-МахIаммадгу, Айдамиров Сергейгу.
![](http://ilchi.beget.tech/wp-content/uploads/2019/06/0091.jpg)
[dropcap]О[/dropcap]ьрчIал дартIсса материаллу, цIанагу яхьуну дуссар школалий. Ккуллал шярава дяъвилийн лавгун ивкIун ур 412 чув, 229 дяъвилия зана къавхьуссар. Сайки 320-нная лирчусса дяъвилул гьурттучитурал суратру дуссар дартIун. Суратру къаляркъуминнал цIарду дуссар. Бусанна кутIану Ккуллал цалчинмур школалул тарихну хьусса улча лахьхьултрал, цаппара давурттая нава гьуртту хьуминнуятугу.
Ккуллал школалул улча лахьхьултрал командалул 1962-ку шинная, 1982-ку шинайн биянин гьарца шинал бувгьуну бур цалчинмур кIану райондалий дуллалисса туристурал ва улча лахьхьултрал слетирттай. Райондалий цалчинмур кIану бувгьусса командалул гьурттушинна дувайсса диркIссар республикалул слетрайгу. Ккуллал школалул командалул 1964-ку шинал му слетрай бувгьуну бур 2-мур кIану. 1965,1966,1967,1968-ку шиннардий бувгьуну бур 1-мур кIану.
![](http://ilchi.beget.tech/wp-content/uploads/2019/06/0111.jpg)
[dropcap]В[/dropcap]ай циняв шиннардий Ккуллал школалул командалул каялувчину ивкIссар Оьмаров Аьли. 1964-1967-ку шиннардий нагу хьура вай командарттал «капитанну».1965-ку шинал на гьурттушинна дурссия Дагъусттаннал цачIундур командалувух Брест шагьрулий хьусса краеведениялул форумрай.1966-ку шиналгу на гьурттушин дурссар Дагъусттаннал цачIундур командалувух Челябинскаллал улклуйсса Златоуст шагьрулий слетрайгу. Жул школалия камандалуву буссияв нагу, Аскандаров Гьарунгу. Жул командалул аьмну бувгьуссия 3-мур кIану. Жущал бястлийсса командартту дия чIярумий студентътурая сакин дурсса.
[dropcap]М[/dropcap]укун бунугу, на гьуртту хъанахъисса группалул гео-физикалул кумаграйну мяъдан ххал бавриву бувгьуссия 1-мур кIану. Мунихлуну ттун бахшиш хIисаврай дуллуна геологиялул институтравун уххансса направление-рекомендациягу. Амма нарив язи дургьуссия учительналмур касму.
1963-ку шин. Июнь барз.Экскурсиялий лавгссияв Ккулату –Дарбантлив, МахIачкъалалив, ЦIуссалаккуйн. Гикку, гьай-гьайкьай, ЦIуссаккулув. Жу буссияв 11 оьрчI, 6-9 классру къуртал бувсса. Ккулату жу бувкру колхозрал кьай духхай машиналий. Шоферну ия Ибрагьимов Аскандар. Жул каялувчину ия учитель Оьмаров Аьли. Га чIумалсса цалчинсса махIаттал шаву хьуна ттун жула Хъуннех бакIъяларай най дунува, КьукIмая нанисса Чирах-Чай тIисса нех бакIларай най ххал шаву. Ттун ганиннин къакIулссия нехру личIи-личIисса чулухуннай дачайшиву.
1963-ку шин, октябрь. Бахьтта Ккулату лавгссияв Оьргълив. Жу га чIумал буссияв 7-10 классирттаву дуклакисса 15 оьрчI. Ххал бувссия Оьргърал художествалул комбинат. Лавгссияв мукунма Оьргърал хIатталливсса аьжаивсса кIалабарзру ххал буван. Га чIумал га хIатталливсса ца кIалазурул чIарав авцIусса ттул сурат рирщуну дия «Комсомолец Дагестана» кказхитрай.
1964-ку шин. Лавгссияв Ккулату Ссугърахьхьун. Лагавугу жул хьуна Надир-шагь ххит увсса кIантту ххал бан тIисса. Жул каялувчинугу уссия гава Оьмаров Аьли.
1964-ку шин. Лавгссияв бахьтта (ца-ца чIумал ххуллийх нанисса машинарттайгу щябикIайссияв). Ккулату Закаталлайн. Тиччагу Гуржиял Телеви тIисса шагьрулийн, яла – Ттуплислив, Орджаникидзелив, Грозналийн, МахIачкъалалив, гиччагу — Ккулув. Жу буссияв 7 оьрчIгу, шама учительгу – Оьмаров Аьли, Кьурбанов МахIаммад, КьурбанмахIаммадов Аслан.
1966-ку шин, июнь барз. Га шинал жу лавгссияв Ухссавнил Къапкъазнаву Хъун дяъвилул чIумал дяъвирду най бивкIсса кIанттурду ххал буван. Жу буцин Ккуллал колхозрал, скамейкартту бувну, бартовой машина буллуна. Ганил шофернугу ия МутIаев Ибрагьин. Жу лавгссияв Гуржиял аьрали ххуллийх, бивссияв Сухумилийн, Новороссийскалийн, гиччагу — махъунмай Ккулув.
1967-ку шин.
Га шинал жу лавгссияв, бачIи ххуллийх бахьтта бачIиннуйхгу машиналий, Араканнал даралувун. Гава чIумал Буйнакскаллал райондалийсса Терменлик тIисса туристурал база бусса кIанай хьусса слетрай жул Ккуллал школалул командалул бувгьуссия Дагъусттаннай 1-мур кIану. Га командалул капитан хIисаврай на увцунав Дагъусттаннал командалувун. Яла жу лавгссияв майрал 9-нний Брест шагьрулий дуллалисса: «Форум юных краеведов» тIисса форумрайн.
Муния махъ, 1967-ку шинал, на дуклан увхссияв Дагъусттаннал Педагогикалул институтравун. Миксса кIанттурдайн ивсса ттул кIулшивруву хъинну хъуннасса луртама хьуна. Дуклакийни бяст багьсса кIанттай данди ацIангу хъинну ххуйну шайва.
Рамазан Мамаев,
Ккуллал цалчинмур школалул завуч