КIулсса куццуй, октябрь барз баян бувну бикIай Бугьараминнал барзну. Му зурул мутталий къуллугъчитал, жагьилтал, дуклаки оьрчIру бугьараминнащал хьунабакьай, миннан кумаг буллай, тяхъашивуртту дуллай, ссупрарду тIитIлай. Хъинну ххуйну лавгунни Ккуллал райондалий мукунсса барз.

ХIажимурад ХIусайнов
Сентябрь зурул дайдихьулийва, райондалул бакIчи Сулайманов Сяидлул хIукмулийну, хIасул бувну бия комиссия. Му комиссиялул хъунмурну бувчIуну бия Ккуллал райондалул муниципал сакиншиннарал бакIчинал хъиривмур Илиясова Сабрина. Ванил дуллансса давурттал сияхI, график бувна зурул лахъишиврий 14-гу шяраву бугьараминнащал дансса хьунабакьавурттал, давурттал. Хъинну ххуйсса гьурттушинна дунни гьарца давривух Ккуллал райондалул Ветерантурал советрал бакIчи Загьидиев Аьбдуллул, райондалул бакIчинал маслихIатчи ва пресс-секретарь Хизриев Шамххаллул, райондалул администрациялул отделлал бакIчитурал, Соцзащиталул пишакартурал, культуралул зузалт­рал, райондалул жагьилтурал ва цила Сабрина Илиясовал, мукунна райондалул бакIчинал хъиривма Хизри Мутаевлул. Циняв хьунабакьавуртту ласлай бия «Щунудагъ» телевидение. Ккаккан дувайва ми кьунниялай эфирданувух.
Ккуллал райондалий хIакьи­нусса кьини ур 941 захIматрал ветеран. Миннавату 268 ур «труженики тыла» статусрал инсан. Ур 4 инсан 90 шинава ливчусса: Ккулув бур Алхуев Рамазан, Разуева ПатIа, Хъусрахь – Манкуева Бика, СумбатIлив – Бугъаева Асият. Вайннан, шаппа-шаппайнма лавгун, райондалул бакIчинал цIания буллунни Барчаллагьрал чагъарду ва арцуйнусса бахшишру.
Ххуйсса, хъиннура кIицI дувансса хьунабакьавуртту хьунни ЦIуйшиял, Къяннал, Ккуллал, Хъусращиял, ЦIущуллал, Вихьуллал шяраваллаву. ХIатта вайми шяраваллавусса хьунабакьавурттугу ххуйну ларгхьурчагу. ЦIуйшиял шяраваллил бакIчи Мадаев Маликлул, ссуп­ра тIитIаву дакъа, 40 угьарачунан чяй хIачIайсса сервисру дуллунни. ЦIуллу уваннав ина, Малик!
Бугьараминнал кьинирдан хасну, Ккуллал райондалий яхъанахъисса, 60 шинава ливчусса, бугьараминнал дянив хьунни шахматирттал чемпионат. Валлагь шикку, бугьарасса буккулт бухьурчагу, гужсса бяст-ччал най бия. Ххув хьуминнан дуллуна, бувгьусса кIанттах бурувгун, 5, 3, 2 азарда къурушру. КIицI дуванну миннал цIарду: 1. МахIаммадов ХIасан, Ваччату. 2. ХIасанов Исмяил, Вихьлияту. 3. Кьурбанов Адам, Ккулату.
Жула бугьараминнах ургъил бухьурча, жухвагу бикIа­вантIиссар жуярва жагьилминнал. Угьара къахьунсса цучIав акъахьувкун, вайннал бивхьусса захIматрал дуцин дангу къахьунтIиссар. Амма жува вайннал бувмур дакIния гьан къабувну ябуварча, жуллами дакIурдивугу паракьатшиву дикIантIиссар. Дуниялгу паракьатну личIаннав.