Лахьхьу Гъумучиял клубраву хьунни Гъумучиял школа ва лицей хьхьичIунсса ккаккиярттащал къуртал бувминнан медаллу дуллалисса шадлугъ. Муний гьуртту хьунни «Лакрал район» МР – данул бакIчи Юсуп МахIаммадов, ванал хъиривчутал, кIулшиву дулаврил управлениялул хъунама Явсупи ХIамзаев, учительтал, школа къуртал бувминнал нину-ппу ва мачча-гъанми.
Шадлугъ тIитIлай, райондалул бакIчи Юсуп МахIаммадовлул райондалул администрациялул ва депутатътурал цIания школа къуртал бувми барчагу бувну, чIа увкуна миннан гихуннайсса дуккавриву тIайлабацIу.
— ХIакьину зу личIи хъанай буру зула оьрчIшиву ларгсса, зула кIилчинмур къаттану хьусса школалия. Бухлай буру цIусса оьрмулувун. Зул хьхьичI буссар бигьабакъасса ххуллу. Му ххуллу лажин кIялану битансса каши-кьудрат Заннал дулуннав зухьхьун. Бивзний ша бакьиннав!
[pullquote]Школа къуртал бувсса 67 дуклаки оьрчIава медаллу ларсунни 15-нал. Миннава 4 ур Гъумучиял школа къуртал бувсса: Абакарова Камила, Будайчиев АхIмад, Щурпаев Идрис, Учуева Гьуманчи; 7 – лицей къуртал бувсса: Буттаева Белла, ХIаммадаева Роза, МахIаммадова ХIурун, МахIаммадова Саида, Ссунгъуров Бадруттин, ХIусманов Баттал, Аьлилова РахIимат; Братилова Карина (Кьубиял школа); АхIмадов АбутIалиб (Хъурхърал школа); Шамилова Оксана (Щардал школа); Хинчалова Лаура (ГьунчIукьатIрал школа)
[/pullquote]Ци пиша язи бугьарчагу, кьадарданул чунмай бичирчагу, зула нитти-буттахъангу, учительтурангу ххаришиврунсса, пахрулунсса наслу зуяту букканнав. Умуд макьукьару шагьрурдай куннасса шартIругу, давурттугу жулла райондалий дусса чIун дучIантIишиврийн. Амма хъама мабитару, Лакку улклул ялун бучIантIимур зул кIунттихьгур бусса, — увкуна ванал.
Хъирив барча бувуна медаллу ларсми.
Школалул ва лицейрал директортурал Жяъпар Канкаевлул ва МахIаммад Хъунбуттаевлул школа къуртал бувминнан цала оьрмулул кIилчинмур шачIанттуйн лахъансса тIайлабацIу чIа тIий чIурчIав дуллай бия замана ци чулинмай кIура баярчагу, оьрмулул дуцин ду-дакъашиврий хIисав дуллай бухьурчагу, инсан так кIулшивурттал айшиву бюхттул.
Ва щаращисса дунияллий, бигьабакъасса оьрмулуву лайкьсса кIану бугьансса каши-кьудрат Заннал дулуннав тIий бия школа къуртал бувми барча бан бувкIсса кIулшиву дулаврил управлениялул хъунама Явсупи ХIамзаев, классрай каялувшиву дуллай бивкIсса Умамат ХIасанаьлиева. Школа къуртал бувминнан ххуллухъиндаран ххаллилсса концерт хIадур дурну дия райондалул магьирлугърал зузалтрал.
Лажин хIадур дурссар
Зулайхат Тахакьаевал
