Ларгсса нюжмардий Гъумучиял клубраву хьунни Гъумучиял школа ва лицей къуртал бувминнан аттестатру буллалисса шадлугъ. Муний гьуртту хьунни: Лакрал районданул бакIчи Юсуп МахIаммадов, Лакрал райондалул администрациялул бакIчинал хъиривчутал Юсуп Рамазанов, Соня Макьаева, Амсар Къажлаев, КIулшиву дулаврил управлениялул хъунама Явсупи ХIамзаев, райондалул идарарттал каялувчитал, учительтал, школа къуртал бувминнал нину-ппу ва гъан-маччами.

Шадлугъ тIитIлай, райондалул бакIчи Юсуп МахIаммадовлул кIицI лавгуна гьашину школа къуртал буллалиминнан жапасса шин хьушиву – ЕГЭ-рду дулаврил низам даххана давриву цалчинсса захIматшивуртту духIан багьшиву. Амма ххуйсса ккаккиярттащал бувкшиву — Республикалул ХIукуматрал хъунаманачIасса батIаврий Лакрал район кIицI ларгшиву ЕГЭ-рду дулавриву низам лиян къадиртсса ва ххуйсса ккаккияртту хьун дурсса районнал сияхIраву хьхьичIминнувух. Райондалул администрациялул ва депутатътурал цIания школа къуртал бувми барчагу бувну, чIа увкуна миннан гихуннайсса дуккавриву тIайлабацIу.
— Ци пиша язи бугьарчагу, кьадарданул чунмай бичирчагу, зулва нитти-буттахъангу, учительтурангу ххаришиврунсса, пахрулунсса инсантал зуяту букканнав. Умуд макьукьару шагьрурдай куннасса шартIругу, давурттугу жулла райондалий дусса чIун дучIантIишиврийн. Хъамамабитару, лакку улклул ялун бучIантIимур зул кIунттихьгур бу­сса, — увкуна ванал.
Хъирив барча бувуна медаллан лайкь хьуми. Гьашину медаллу цал дукьан дурну, яла цIунилгу дуллан хIукму бувну бур, амма медаллу цирда ттигу хIадурну дакъашиврийн бувну, шадлугърай ми къадуллунни. Медаллу ласун лайкь хьусса 15 выпускникнан администрациялул чулуха дуллуна ХIурматрал грамотарду.
Школалул ва лицейрал директортурал – Жяъпар Канкаевлул ва МахIаммад Хъунбуттаевлул буллуна аттестатру. Школа къуртал бувминнан цалва оьрмулул кIилчинмур шачIанттуйн лахъансса тIайлабацIу чIа тIий, вай кIиягу чIурчIав дуллай бия замана цуксса баххана хьурчагу, оьрмулул дуцин ду-дакъашиврий хIисав дуллай бухьурчагу, инсан бюхттул так кIулшивурттал айшиврий.
Мариян Дандамаевал цIанийсса Гъумучиял оьрчIал магьирлугърал школалул директор Лида Кьурбановалгу школа къуртал бувшиврул свидетельстварду буллуна Сулайманов Аьбдулжалиллун, ХIасанова Зулайхатлун, Оьмариева Изольдан, Измаилова Аьишатлун, Аьбдуллаев Ибрагьимлун. КIицI лавгуна вай оьрчIал райондалий хъанахъисса гьарца мероприятиялий чялишсса гьурттушинна дайсса диркIшивугу, республикалул конкурсирдай хьхьичIунсса кIану цимилвагу бувгьушивугу.
Ва щаращисса дунияллий, бигьабакъасса оьрмулуву лайкьсса кIану бугьансса каши-кьудрат Заннал дулуннав тIий бия школа къуртал бувми барча бан бувкIсса КIулшиву дулаврил управлениялул хъунама Явсупи ХIамзаев, классирттай каялувшиву дуллай бивкIсса Зугьра Кьурбанова, Роза Бавасулайманова ва Эльмира Хъунбуттаева.
Цалва оьрчIан дуллусса тарбиялухлу директортурахьгу, учительтурахьгу барчаллагь увкуна школа къуртал бувминнал буттахъал — Юсупов Ажублул ва Щурпаев Шяпинал.
Школа къуртал буллалими барча бан ххаллилсса концерт хIадур дурну дия райондалул Магьирлугърал управлениялул зузалтрал.
Муния махъ Гъумучиял школа къуртал бувсса оьрчIру ва классир­ттай каялувшиву дуллай бивкIсса Зугьра Кьурбановащал ва Роза Бавасулаймановащал автобусрай лавгуна ПартIу ПатIимал ва Хан-Муртазааьлил гьайкаллачIа суратру рищун — ва шиннардий цIакь хьусса аьдатри.
Шанна шинал хьхьичI выпускной балданий хьусса оьзру сававну, райондалул администрациялул ва КIулшиву дулаврил управлениялул каялувчитурал хIукму бувну буссия гихуннай райондалий мукунсса вечерду къадуллан, аттестатру шадлугърал даражалий клубраву булаван. Гъумучиял школа къуртал буллалисса оьрчIал нитти-буттахъул сиптачитал хьуну бия ва байран дуван, яла чаннами, марцIми хияллал ва умудирттал видурцIусса оьрмулуву дурарагу ва цал хьунадакьайсса шадлугърая оьрчIру махIрум къабаншиврул. Цивппа ялув бацIан бакIрайнгу лавсун, пикри бувну бия байран шиннардил хьхьичIсса аьдатрай дуван.