ХIурмат бусса «Илчи» кказит, кказитрал зузалт!

На, ХIажиева Камилат, барча тIий бура зухь зул ххаллил­сса, бусравсса байран – 25 шинал таварих. ЧIа тIий бура зун цIуллушиву, талихI, тирхханну, паракьатшиву, барачатшиву, тIайлабацIу зу дуллалисса давриву. Аллагьнал кабакьиннав зуцIунгу, зул хIурмат буллалиминнацIунгу. «Илчилул» 50 шинал юбилей хьунадакьлакьисса чIун дучIаннав.
На хъанай бура «Илчи» кказит ххираминнаясса цану. На кказит буклан бивкIния шинмай 25-рагу шинай чивчуссар. ТтучIа ядуллай цимирагу шинал подшивкарттугу дур.
На зий буссияв райондалул библиотекалий 43 шинай. Библиотекалий бунугу, кказит гьарца шинал шаппайгу чивчуссар, ттиния тинмайгу чичлантIиссара. На нарагу чичара макьалартту, гьан дара кказитрайн. Ххуйну, бусравну оьрму бувтсса инсантурая макьаларду, хаварду, балайрду чичара, ттиния тинмайгу шаймур буванна. Бусраврай кьамул бувну, бищару зу ми кказит­рай. Барчаллагь тIий бура.
Ттула цIания, чансса дунугу, гьан дуллай бура 500 къурушгу.
На оьвтIий бура лакрал жяматрайн: «Барча бувара «Илчи», чичара кказит, шаймур бувара», — тIий. «Илчилий» дикIай личIи-личIисса, ххишала дакъа аьркинсса макьалартту.
Мунияту цIуллу баннав цал ттигу зузалтгу, кказитгу.

Ва «Илчилул» ххуйшиву,
ЖучIанма букIлакIисса,
Жулла дакIру ххари дан
Ххуймуния буслайсса.

Оьрму бусраврай бивтми,
«Илчий» вийну жун кIул шай.
Ина гьарца аьркинмур
Чийвун буккан бувара.

Гьан буллали, чичлачи
Балайрду ва хаварду,
Бусраврай кьамул бувай
«Илчилул» ми мудангу.

Кьуния ххюра шинай
«Илчилул» бивтсса ххуллу,
Дуллай бивкIсса давурттив
Бусраврай барча тIийру.

ЦIуллушиву чIа чинну,
Зузалтран ва кказитран,
Ттиния тихуннайгу
Жунна тIитIала тIитIлан.

Ххуй «Илчий», ххира «Илчий»,
Лак ххари бувай «Илчий»,
Ина бучIай кьинилух
Жу ялугьлан бикIару.
Нагу «Илчи» ххирасса, хIурмат бусса
Камилат ХIажиева.
ш. Ваччи