![](http://ilchi.beget.tech/wp-content/uploads/2019/07/dewed343rwerw.jpg)
Амма ттул ахъувусса нисварти,
барчамантал, гьаз хьун къабитлай бур
Июнь зурул дайдихьулий сукку хьуну, гъараллу лачIлай, инсантурал къатрал хьхьичI ахъаву дургьусса бакIлахъия мадара гьаз хьун дурунни.
(Хъуруми тIурча, махъсса шиннардий дугьлайвагу бакъар). Зурул мутталийгу тIабиаьтрал, ваца бакIлахъия ци зун дикIайрив ххал дуллалиний кунна, чявхъа бичавай, вирхху бавай, мадара ялун бигьавуртту дурунни.
Буниялагу бувчIлан бивкIунни, жула зунттаву чIярусса шиннардий дугьлай, кIанттул хьуми бакIлахъия цукунчIавсса чявхълуща «гъагъан» дуван къашайшиву. Мукунсса бакIлахъияну хъанай дур: лухIи хъюру, магъарда, чIикIунтIа, къур, нувщи, накьлил уртту, шагьнал лачIа, шагьнал хъюрув, калан, помидор ва цаппара ахъулссаннул журалул мурхьру. ТIайлар майрал байбихьулийва бувгьусса ттул ахъувусса нисварти гьаз хьун къабивтунни.Амма, барчамантал бур, яхI буллай, аьрщарацIун лавчIун.
Вана уттигу июль зурул цанний буллай бия, кIусу-кIутIу тIий марххала. ТIайлар, ва марххала, шяраваллаву аьрщарай лахъи къалавгун, най бунува баслай бия. Ликлай бия Щунузунттуй ва лахъми зунттурдай. Гьай-гьай, жучIарасса тIабиаьт кьянкьасса дур.
Жува, зунттаву яхъанахъисса инсантал Аллагьнал ябуллай буру. Циван учирча, шикку, ци чявхъа гъараллу лачIурчагу, апатIру чанну бакъа къашайсса буну тIий. Жула кIантту мурзусса бур. Амма ца-ца чIумал инсантурал цала бур цанма цала бала ласлай. Миннувасса цану бур неххамачIув къатри даву.
Цаппара шиннардил хьхьичI телевизорданувух ккаккан буллай бия Ставрополлал улклуйсса Кармадон тIисса кIанттайсса къатри мугьалттул ларсун. Бюхъай зунгу ккавккун бикIан, МахIачкъалалия Дарбантлив нанисса трассалул чIарав, Манасрал чIарах нанисса неххамачIух дурну дур щаллусса шяравалу. Ва хьхьичIара къадикIайссия. Гьашину кунна, гъараллу лачIлай, зунттава мугьали буккарча, га шяравалу хьхьириву хьунтIий дур. Чун буруглай биявав экологтал, гикку къатри дуван ихтияр дуллалисса чIумал? Мабизларду инсантал зунма зува «къатIри».
ТIабиаьтрал цила сюрпризру махъсса шиннардий чIярусса ккаккан дуллай дур. Учала бур «ЦIараща ва щинаща буруччиннав» тIисса. Бурувччуну бикIияра!