«Лакрал райондалул жагьилтал экстремизмалийн ва терроризмалийн къаршину» тIисса акциялул лагрулий ларгсса нюжмардий Щардал шяраву хьунни экстремистурал каруннища ливтIусса райондалул полицанал зузалтрал аьпалун хас дурсса футболданул турнир.

Зулайхат Тахакьаева
Экстремизм ва терроризм — ттизаманнул Аьрасатнал обществалул яла нигьачIисса буруккин, оьттул цIалацIисса тема. Экстремистурал дайлсса ккарччахьхьун бигьа-бигьанма бириллалисса «нахIу парча» бур жагьилтал, хаснува аькьлу-кIулши цалий дацIан дурасса чIаважагьилтал. ЧIаважагьилтуран экстремизмалул хьхьичIалу кьукьинсса чаранну хIисав бай ми магьирлугърахун ягу спортрахун машхул баву.
Мунийн бувну, Лакрал райондалий шиная шинайн хъуннасса къулагъас дуллай бур дуклаки оьрчIру ва жагьилтал спортрахун машхул баврих. Ччя-ччяни шайссар, хъун хъанахъисса ник цIуллу-цIакьну тарбия даву мурадрайсса, ми оьмуния, оьккимуния буруччаву мурадрайсса, жура-журасса спортрал тIуркIурду, бяст-ччаллу. Миннувасса цаппарасса бур аьдатравун багьсса: лачIунбуккаврил, волейболданул, боксрал, теннисрал; дуклаки оьрчIал дянивсса спартакиадартту; Ххувшаврил байрандалун, Физкультурникнал, Конституциялул, Наркоманиялийн къаршисса ва Жагьилтурал кьинирдан хас бувсса тIуркIурду.
Яла-яла Лаккуйгу сий хъуннар дуллу-дунияллийва машгьурсса футболданул. Гьарца шинал шай­ссар КIулшиву дулаврил управлениялул кубокрансса, Жагьилтурал кьинилун хас дурсса футболданул турнирду.
КIулшиву дулаврил управлениялул кубокрансса райондалул школарттал дянивсса футболданул турнир дайдишайссар цIусса ду­ккаврил шин дайдихьулий ва мунил финал шайссар июнь зурул 1-нний ОьрчIру буруччаврил кьини.
Наркотикирттайн къаршисса кьинилун ва Жагьилтурал кьинилун хас дурсса футболданул турнир шайссар июнь зурул 26-27-нний, райондалул агьали ватан ххирану тарбия баврил программалул лагрулуву.
Шамилчинсса шинни Аьрасатнал шагьрурдая отпускардай ватандалийн бигьалаган бувкIсса Щардал шярава бувксса ишбажаранчитурал сипталийну, экстремистурал кIунттища ливтIусса райондалул полицанал зузалтрал аьпалун хас дур­сса турнир лув-ялув дуллай.
Мармарчарийн увксса 8 язисса арс – райондалул оьрмулуву дагьсса дазин къашайсса хъякру, тарихрай багьсса вярчIу, аьрщарай хьусса хъин къашай щаву. Вайннал аьпа абад бансса давуртту дуллан ва мукьахунмай мукунсса лухIи балаллая буруччинсса чаранну ляхъланни тти гихунмай ватанлувтуран ливчIсса.
Мунияту райондалул бакIчи Юсуп МахIаммадовлул цалва ихтилатраву кIицI лавгуна турнир дуллалаву цалархIал пашманссагу, ххариссагу иш хъанахъишиву: пашмансса – агьалинал паракьатшиврул къаралданий бавцIусса жагьилсса арантурал бакIру бат шаву, ххари­сса – гайннал аьпа абад бан­сса сиптачитал райондалия буккаву. Барчаллагь увкуна миннал аьпа абад бансса, буттал улчагу, районгу, жула мархригу хъамакъабитансса давурттал сиптачитал ва спонсортал хьусса, цалла цIарду кIицI мадару куну тавакъюгу бувну, дакIнийхтуну даву дузрайн дуккан дурсса жагьилтурахь.
Турнирданий гьуртту хьунни 11 команда: Щардал, Ххюлуссуннал, ЧIурттащиял, Хъурхърал, Гъумучиял, Хъунайннал, ГьунчIукьатIрал, Хьурттал шяраваллал; Аьрасатнал МВД-лул «Лакский» МО-лул ва ДЮСШ-лул. Командартту сакин хьуну дия шяраваллаву ялапар хъанахъи­сса ва шагьрурдая бувкIсса жагьилтурая.
Финалданийн дурккуна Щардал ва ГьунчIукьатIрал командартту. Вайннал тIуркIулух бурган бувкIун бия райондалул бакIчи Юсуп МахIаммадов ва идарарттал каялувчитал.
ТIуркIу бунияла­сса хьуна.
Занази кубок цIунилгу лавсунни Щардал командалул; кIилчинмур кIану бувгьунни ГьунчIукьатIрал командалул; шамилчинмур кIану бувгьунни Гъумучиял «Кази-Кумух» командалул.
«Лучший вратарь» ва «Лучший игрок» цIардан лайкь хьунни ГьунчIукьатIрал командалувасса Кьадиров Рашид; «Лучший защитник» – Гъумучиял командалувасса Бавасулайманов МахIаммад; «Лучший полузащитник» – Мусаев Мирон, «Лучший нападающий» – Закаржаев Арсен – кIиягу Щардал командалувасса; «Лучший молодой игрок» – ГьунчIукьатIрал командалувасса Чавтараев Даниял.
Ххув хьуми барча буллай, Юсуп МахIаммадовлул кIицI лавгуна турнирданул даража шиная шинайн лахъ хъанай бушиву, мунил сакиншиннагу, гьуртту хъана­хъиминнал усттаршивугу чIаланну хьхьичIуннай хьушиву.
«Бяст-ччал цукунчIавсса тIул дакъакъашиву къархьуну, низамрай лагаврил бусласиссар жяматраву ливтIусса полицанал зу­залт­рал аьпа хIурматрай буручлай бушиву, мунин лавхьхьуну лавайсса бушиву турнирданулмур хIурматгу», – увкуна Щардал шяраваллил бакIчи Мирослав Ибрагьимовлул. КIицI лавгуна, шяраваллил администрациялул бюджетрава къуруш харж къадурну, жяматрал ка-кумаграцIух дузал дуршиву турнирданий гьуртту хъанахъисса хъамал кьамул бан­сса гьарцагу шартIру. Мунихлуну барчаллагь увкуна турнирданул спонсортурахьгу, узданну чIарав бавцIусса щарнил агьулданухьгу. Бувсуна шяраваллил жагьилтурал кабакьаврийну шяраву буллай бушиву ттуплий буккайсса цамур майдан ва ялунчIилсса турнир микку хьунтIишиву.
Турнир ххаллилсса сакиншиндарай даврихлу барчаллагьран райондалул администрациялул Щардал шяраваллил администрациялун дулун ккаккан дунни 25 азарда къуруш.
Мяйжаннугу, турнир ду­сса шаннагу кьини (вай гьантрай цурдагу Лаккуй тачIав дакъачIинсса кIиришиву дия) мюрщи-хъуни къакуну, щалла щарнил агьлу цIан-чаннаву бизлай, ца хъуннасса байрандалул лагрулий хъамал кьамул буллай бия. Шиккува кIицI бан, райондалул «Анавар­сса кумаграл» хIакинтал ва полицанал зузалтгу, муданма кунма, цала-цала кIанттай бия.