«Наркотикгу», «ажалгу» тIисса кIивагу махъ сайки личIи бан къашай­сса кьяйдалий бавхIусса бур цанницIун ца. Цуппагу, Заннал ххуллийсса ажал бакъача, «бикъав ажалуннил» ххуллийсса.
Уттигъанну жула ЦIусса­лакрал райондалий дайдирхьунни «Баян бува ажал бахлахи­сса кIанттул цIа» тIисса щалагу Аьра­сатнаву сакин хьусса акциялул цалчинмур бутIул даву. Ва давугу най дуссия март зурул ахирданийннин. Вара даврил кIилчинмур бутIа тIурча, бартбигьлай бикIантIиссар октябрь зурул 18-нния 29-ннийн бияннин.
Му агьамшиву ххисса акциялул лагрулий, наркотикру ва психотропру бусса кIантту кIул баву бакъассагу, ми буллалисса инсантал ялун личин баву ба­къассагу, жагьилсса оьрмулул заллухъруннал ялун буцлацири бала-апатIирттая исватну бусавугур агьамсса мурадну хъанахъисса.

Мува мурадирал хъирив най бикIан аьркинссар вай жува кIицI буллалицири иширттал ца яла агьамсса бутIану хъана­хъисса, ахир –мяънану ккалли бан багьлагьисса зат – миннухун багьну махъсса инсантал сагъсса оьрмулийн зана битаврил ххуллийсса хIарачат, консультация ва реабилитация хIисаврай.
Яраппий, «наркотикру», «психотропру» тIисса махъру цирив, ми ссахун, цукун дукай­сса затрурив къакIулну ялапар хъанай бивкIсса жула ппухълуннал уздансса ирсирал аьпа исрап буллай къаличIаннав жува. Му исрапшиврул ца яла кьюкьаласса ва кьювкьусса бутIану хъанахъиссар инсаннан (зунтталчунан) Заннал буллусса аькьлу цIан лаган буллалисса бала – наркоманшиврул барашин.

Р. Башаев