Ларгсса ххуллункьини Гъумучиял спортзалдануву «Спорт – наркотикирттайн къаршину» тIисса цIанилу хьунни Совет Союзрал Виричу, летчик-космонавт Муса Маннаровлул Кубокран цIа кусса, районнал дянивсса волейболданул турнир. Мунил сиптачину хьунни Лакрал райондалул бакIчи Юсуп МахIаммадов. Сакин дурну дия турнир Райондалул Магьирлугърал, жагьилтурал политикалул, спортрал ва туризмалул центрданул.

Муний гьуртту хьунни мукьра райондалиясса ацIра команда: Лакрал («Гъази-Гъумучи»), Лакрал райондалул МЧС-рал, Читтурдал, Ххюлуссуннал, ЧIурттащиял, Хъунайннал ); Ккуллал (Ккуллал, Вихьуллал); ЦIуссалакрал (ЦIуссачIурттащиял); Ахъушиял (ЦIалакъяйннал).
Турнир тIитIлатIисса шадлугърай гьуртту хьунни райондалул бакIчи Юсуп МахIаммадов, ванал хъиривчутал Абубакар Къюннуев, Макьсуд Макьсудов, идарарттал каялувчитал. Турнирданул бусравсса хъамал бия Дагъусттаннал цIадурксса спортсмен, волейболист, 1960-ку шиннардий Дагъусттаннал волейболданул цачIун дур командалул капитанну ивкIсса Нуруллагь Оьмаров ва даимгу райондалий хъанахъисса иширттал чIарав ацIайсса Султан ЦIаххаев.

Шадлугъ тIитIлай, Культуралул, жагьилтурал политикалул, спортрал, туризмалул центрданул каялувчинал хъиривчу Малик ХIусмановлул гьуртту хъанахъисса командарттаягу бувсун, чIа увкуна гьуртту хъанахъиминнан оьрмулуву ва спортраву тIайлабацIу, дусшиврийсса бяст-ччал.
Юсуп МахIаммадовлул кIицI лавгуна турнир дуллалишиву ца лакрал акъасса, щалагу Дагъус­ттаннал илданун пахрулунсса чув, щалагу Ухссавнил Ккавкказнаву цалчинсса ва утти­нин увагу усса ца космонавтнан ккаллисса Муса Маннаровлул оьрмулул 70 шинал юбилейран хасну.
Муса Маннаровлул аьламраву дурсса виричувшивурттая, гьунардаягу бувсун, ххи бунни турнир дуллансса пикри бушиву мукьахуннайгу.
Миллатрал цIа-кьини бюх­ттул дурсса цIасса арснан хас дурсса турнирданул агьамширия ихтилатру бувна Нуруллагь Оьма­ровлул, Султан ЦIаххаевлул.
ТIиртIуна турнир райондалул магьирлугърал къатлул зузалтрал Лакрал гимн учаврийну ва Гъумучиял оьрчIал Магьирлугърал школалул «Гъази-Гъумучи» ансамбльданул къавтIалтрал аслисса лакку къавтIаву «Къиссу» щаллу даврийну.

Бяст-ччаллил хIасиллайн бувну, Совет Союзрал Виричу Муса Маннаровлул цIанийсса Занази Кубок цалчинма-цалчин ласун лайкь хьунни ЦIуссачIурттащиял команда. КIилчинмур кIану бувгьунни «Гъази-Гъумучи» командалул. Шамилчинмур кIану кIабавчIунни ЧIурттащиял ва Вихьуллал командарттайх.
Ххув хьуминнан ва хьхьи­чIунсса кIанттурду бувгьуминнан буллунни дипломру, медаллу, Муса Маннаровлул суратращалсса вымпеллу ва арцуйну­сса бахшишру. Муса Маннаровлул суратращалсса мюрщи кубокру ва арцуйнусса бахшишру дуллунни номинациярттай хьхьичIун ливчсса гьурттучитурангу. «Язима игрокнал» цIа ларсунни ЦIуссачIурттащиял командалувасса Заур Ккушиевлул; «Тамашачитурал чулухасса бахшиш» хIалал дурунни Вихьуллал командалувасса Сагид НикIамахIаммадовлул; «Ххувшаврийнсса хъит учаврихлу» тIимур бахшишран лайкьману увккунни «Гъази-Гьумучи» командалувасса Малик ХIусманов.
«ТIайлану кьимат бищаврихлу» дипломру, хъамакъабитулунсса сувенирду ва арцуйнусса бахшишру дуллунни Аьли ХIанапиевлун ва Раджаб Тайгибовлун.
Ххувхьуминнан ва хьхьичIун ливчуминнан пишкаш дан Муса Маннаровлул тIайла дурккун дия цала къулбасгу рирщусса цала суратру.
Укун гьуртту хъанахъиминнангу, тамашалийн бувкI­миннангу дакIний личIансса даражалий хьунни миллат бюхттул бувсса, язисса арс Муса Маннаровлул Кубокрансса турнир.