Ларгсса нюжмардий Д. А. Медведевлул «Единая Россия» партиялул жямат кьамул байсса ОП-лул (Общественная приемная) хъунама Сейфулла Исакьов увкIун ия Лакрал райондалул агьалинал буруккинттах вичIидишин.

Зулайхат Тахакьаева
Муний гьуртту хьун оьвкуну бия Гъумуксса кIанттул ОП-лул сияхIрайн лавсъсса лакрал агьалинал яла цIуцIими буруккинтту багьлагьисса министерствардал ва ведомствардал пишакартурайнгу. Сейфулла Исакьовлущал бувкIун бия «Справедливая Россия» партиялул Дагъусттаннайсса отделениялул хъунама, ДР-лул Халкьуннал Мажлисрал миллатирттал дянивсса арардал, жяматийсса ва диндалул ккураннал иширттал комитетрал хъунама Камил Давдиев; ДР-лул Шяраваллил хозяйствалул министерствалул информатикалул ва даврил сакиншиннарал отделданул хъунама НурмахIаммад МахIаммадов; ДР-лул имуществалул министрнал хъиривчу Шихими Жаруллаев; Аьрасатнал Федерациялул ПаччахIлугърал Думалул депутатътурал кумагчитал ПатIимат Аьдилова ва Уллубий Аьлиев.
ОП-лул давриву гьуртту хьунни райондалул бакIчи Юсуп МахIаммадов; райондалул администрациялул бакIчи Абакар Къюннуев; заместительтал Амсар Къажлаев ва Соня Макьаева; Партиялул кIанттул исполкомрал каялувчи МахIаммад Ссунгъуров; райондалул Финансирттал управлениялул каялувчи Аьйша Амирханова; райондалул КIулшиву дулаврил управлениялул каялувчи Явсупи ХIамзаев; райондалул Шяраваллил хозяйствалул ва экономикалул управлениялул каялувчи Ризван Оьмаханов; «Россельхозбанк» ОАО-лул Лакрал райондалийсса филиалданул каялувчи Шамил МахIаммадов ва шяраваллал администрациярттал бакIчитал.
ЧIалай дия кIанттул ОП-лул даву цила кIанттайн дагьну душиву: лавайсса даражалий сакин дурну дия жямат кьамул бансса хIадуршинна; агьалинал чулухасса оьвчавуртту цинярда дия чагъардай чирчуну; чIирайн лавхъун бия Партиялул ттугъ.
Ва кьини ОП-лул кьамул унни личIи-личIисса суаллащал увкIсса 30 инсан. СияхIрайн лавсунни вайннал буруккинтту.
ЧукIуннал «Искра» СПК-лул хъунама ХIаммада ХIаммаевлул сукку бувна щалла республикалул шяраваллил хозяйствалул зузалтрал буруккин – мелиорациялийн багьайсса. Ванал шикаят бия къутаннайсса хъуруннайн дирхьусса щин къадиллай, бакIлахъия кьакьлай, хъузалтрал захIмат чулийн къабук­лай бушиву. Сейфулла Исакьовлул бувсуна чIярусса районнайгу вава буруккин бушиву. Депутатнал кумагчинайн тапшур бувуна ва масъала аьмну щаллу бансса цасса программа ххалдигьин тавакъю буллалисса депутатнал оьвчаву тIайла дуккан ДР-лул Шяраваллил хозяйствалул министерствалийн.
Райондалул азарханалул зузалтрал чулуха хъунама хIакиннал хъиривчу Лиана Аминтаевал ва Шагьмандара Рамазановлул депутатътурайнсса оьвчаву дия 2003 шиналва буллай байбивхьусса больницалул къатрал ялув. Бувсуна хьхьичIарасса обкомрал къатраву бивхьусса больницалий я зузалтран, я къашайшалтран цукунчIавсса шартIру дакъашиву. Ватандалий зун ччай бувкIсса жагьилсса хIакинтуран шартIру дакъасса больницалий зун къулайну бакъашиву ва мунийн бувну ми махъаллил хъанахъисса кIанттурду хьунабакьлай бушиву. Ва суалданул ялув хIукму бувна райондалул администрациялул хIадур бан больницалул буру­ккинттая бусласисса Республикалул ХIукуматрайнсса чагъар.
Ванихава лавхьхьусса бия Гъумучиял школалул директор Жяъпар Канкаевлулмур тавакъюгу – шанна-мукьра шинал хьхьичI буллай байбивхьусса школа къуртал бан кабакьу бара тIисса. Ванал бувсуна 1961 шинал дурсса школалул къатри дух хьуну душиву, райондалул базовыйсса школалул къатри ттизаманнул тIалавшиннардацIун дакьлакьисса дакъашиву. Депутатътурал махъ буллунни ва масъала щаллу бан кабакьу бан.
Райондалул учительтал ва цIуллу-сагъшиву дуруччаврил зузалт шикаятрай бия коммунал хIаллихшиннардил ялув. Депутатътурал бувсунни ва буруккин чулийн бутансса чаранну ляхълай бушиву.
Уриннал «Коммунист» СПК-лул хъунама Халид МахIаммадов тавакъю буллай ия райондалий гьаннарал ферма тIитIиншиврул ххуйсса жинсирал бярчру ласун кумаг бара, тIий. Ва масъалалул ялув ванан дагьайсса консультация дуруна шяраваллил хозяйствалул отделданул каялувчи НурмахIаммад МахIаммадовлул.
Чансса дакъая «Россельхозбанкрал» хIаллихшиннардийн дагьайсса оьвчавуртту. Ишбажаранчишивруха зузими буслай бия ЛПХ-рду тIитIин ларсъсса кредитру закондалийн бувну лархъун духьурчагу, паччахIлугърал чулухасса субсидияртту ласун къахъанай бушиву. Ва суалданул ялув аьркинсса бувчIинбавуртту дурунни банкрал филиалданул хъунама Шамил МахIаммадовлул.
Гъумук ялапар хъанахъисса жагьилсса учитель Сиражуттин Къапиевлул тавакъю бакIрайн лавсунни райондалул бакIчи Юсуп МахIаммадовлул. Ванан ччай дур ЛПХ тIитIинсса аьрщи.
Депутатътал ва агьали рязину ливчIунни жямат кьамул баврия. «Единая Россия» Партиялул Да­гъусттаннайсса РОП-рал хъунама Сейфулла Исакьовлул гьарцагу инсаннах вичIигу дирхьуну, бувчIин бавуртту дуруна. Ванал бувсуна къуллугъчитуращалсса хьунабакьавуртту ва депутатътуращалсса тIивтIусса диалог Лакрал райондалий ттинин къавхьушиву. Мунийн бувну райондалул агьалинал цIания «Единая Россия» Партиялийн барчаллагь баян бувуна.