Аьрасатнал грэпплинграл ва джиу-джитсулул чемпионатрай гьуртту хьуну, мусил медаль ларсун увкIунни ЦIуссалакрал райондалийсса Гьамиящиял шяравасса МахIаммад Ибрагьимов.
Имара Саидова
МахIаммад ур хIала-ккаласса данди буккавурттал спортрал магьиршиву ккаккан давриву хьхьичIун ливчусса, итххявхсса спортсмен.
Увну ур МахIаммад 1997 шинал февральданул 21-нний Гьамиящиял шяраву. Спортрал чулухунмайсса гьунар ванаву чIивину унува аьлтту хьуну бур. ЛачIунуккаврил спортрал карьерагу дайдирхьуну дур Гьамиящиял шяраву, боевой самболул гьунар бусса тренер Артур КазаковлучIан зананшиврул ивзун ур Хасавюртлив.
Цалчинсса ххувшаву ларсун дур 2015 шинал Евразиянал боевой самболул чемпионатрай. Ва чемпионатрай ххув хьуну махъ МахIаммадлун хъиннува гъира багьну бур грэпплинграхун агьансса. 2017 шинал ва Аьрасатнал ва дунияллул грэпплинграл ва джиу-джитсулул спортрал чемпион хьуну ур. Ххувшавурттал ххуллий МахIаммадлун хьунадаркьуну дур цикссагу захIматшивуртту.
Чемпионатрай хьусса цIунцIия сававну, ванан хъунмасса хIаллай спортрая арх уцан багьну бур. МахIаммад, ва иширахьхьун рай къабуллуну, цIуницIакулгу зана хьуну ур ринграйн. 2018 шинал ва хьуну ур Аьрасатнал ва дунияллул хIала-ккаласса данди буккавурттал чемпион. Ванал спортрал карьералуву ва ххувшаву хьуну дур яла асар хьунмур ва дакIний личIанмур. Европанал, Аьрасатнал ва дунияллул чемпионатирттайсса хьхьичIуннайшивурттал буслай бур МахIаммад захIмат ххирасса, цала хьхьичI бивхьусса мурадру бартбигьин бюхъайсса жагьил ушиву. Му хъиннува тасттикь хьунни уттигъанну Аьрасатнал грэпплинграл ва джиу-джитсулул чемпионатрай ванал 1-мур кIану бугьаврийну.
