Дагъусттаннал Культуралул министерстволий культуралул министр Зарема Бутаева ва Москавливсса Дагъусттаннал культуралул центрданул президент, профессор Арсен ХIусайнов хьунабавкьунни.
ПатIимат Рамазанова
Вайннал ххал диргьунни Культуралул министерстволул ва Москавливсса Дагъусттаннал культуралул центрданул уртакьну дуллансса давуртту. Вайннувух дур МЦК-лул Москавлив Дагъусттаннал халкьуннал шаэр Расул ХIамзатовлул 100 шинал юбилейран хасну дувантIисса мероприятияртту, МЦК-лул 35 шинал юбилейрацIун дархIусса шадлугъру, гала-концерт.
Зарема Буттаевал бувсунни Дагъусттаннал ХIукуматрал ва культуралул министерстволул жулва билаятрал хъуншагьрулий Расул ХIамзатовлул юбилей лахъа-хъунну кIицI лагансса мурадрай хIадур хъанай бушиву ва Москавливсса дагъусттанлувтуралгу хьхьичIунсса гьурттушинна дуванссар тIисса умуд бушиву.
Арсен ХIусайновлул балжину бувсунни Расул ХIамзатовлун хасну цуку-цукунсса давуртту дуван дакIний буссарив ва МЦК-лул юбилейгу лайкьну дуван хIадур хъанай бушиву.
Бувсунни Дагъусттаннал агьали мудангу хьхьичIунну гьуртту шайшиву культуралул мероприятиярттай, МЦК-лул сипталийну творчестволул мажлисру, художниктурал выставкартту дувайшиву. Гиккура икьрал дунни Зарема Буттаева Москавлив Культуралул центрданул активистътуращал хьунабакьин ва МЦК -лул ва Культуралул министерстволул уртакьну зунсса кьутIи цIакь дуван.
