Лархъна дур дяъвилул цIу, ццах бакъа талайнма бур жулва жагьилтал. Цанна дагьайсса отпускрал чIун дирукун, букIлай бур вай шаппа-шаппайн, цахва ссавур дакъа ялугьлагьисса кулпатирттачIан, гъан-маччаминначIан ва дустурачIан. Уттигъанну МахIачкъала шагь­рулул аьралий комиссар, КIун­диннал шяравасса Кьурбанов Геннадий Шихаьлиевичлул кабинетраву хьуна СВО-рая отпускрай бувкIсса вара шяравасса сержант Казбек Массуевлущалсса ва хъунама лейтенант Бутта Кьурбановлущалсса хьунабакьаву.
Шикку хьуна аьралий майданнивсса аьмсса тагьарунния­сса, ватандалийнсса аьрххилиясса ихтилатру.

Бадрижамал Аьлиева
– Жулва ттаттахъул тIий бикIайва цанма ккавкмур жунма къаккакканнав тIий, амма ккавккунни жунма дяъви. Жулва оьрчIру жучIанна буттал бу­ттал буттахъая дирсса кьануннай ялапар хъананшивруллу, вайннан дяъви къаккакканшивруллу, жулва билаятрал тархъаншивугу, аьрщигу, багьу-бизугу буруччиншивруллу жу хIакьину талатисса. Къаччива я ттунма, я цаймигу жагьилтуран ва дяъви ккавккун, ккаккансса кьадар нясив хьуния махъ, ттул ца мутталийссавагу, ца лахIзалийссавагу пикри къашай махъунмай ца шавагу ласунсса, къагьанна дяъвилийн учинсса, – тIий ур Казбек.

Увну ур Казбек 1994-ку шинал КIундиннал шяравасса Ма­хIаммадлул ва Гъумучатусса Светланал кулпатраву. Казбек 5-мур классравун лавгсса чIумал аьпалул хьуну ур ванал ппу. Казбеклунгу, ванал хъунама уссин Русланнунгу ччяни хъуни хьун багьну бур, вайннал ниттингу биялсса захIмат буван багьну бур оьрчIру ччаннай бацIан буваншиврул. КIундив школалий дуклайгу ивкIун, Казбек лавгун ур аьралуннаву къуллугъ буван. 2017-ку шинал, контрактгу чирчуну, лавгун ур Дальний Востокрайн. Уттигъаннунин къуллугъ буллайгу ивкIун ур Хабаровскалий 64-мур личIисса мотострелковый гвардейский бригадалуву. Казбеклул Украиннайнсса аьрххи хъанай бур цалчинсса аьралий опыт. СВО-райн лавгун махъсса цалчинсса отпускгу хъанай дур ва. Казбек лайкь хьуну ур «За отвагу» медальданун.
Хьунабакьаврий жагьилтурахьхьун буллалисса суаллавасса ца бия дуклаки оьрчIал солдатначIан гьан буллалисса чагъардайн багьайсса. Ванихьхьунсса жаваб дуллай, Казбеклул увкуна:
– Укунсса акцияртту чара бакъа аьркинссар. Дуклаки оьрчIал чагъардал аьралитурал дакIру дуллалиссар. ТтучIанма бувкIсса чагъарду на ябуллай ура, вай на чIун-чIумуй цIунила цIунил буккара. Укунсса ча­гъарду бувкIний жухва ватандалий ялугьлай бушиву, жува хъамакъабивтшиву цал ххишалану тасттикь шай, гихунай зунсса-занансса гъирагу, гужгу ххи шай. Аьраличувнан кIулну бикIан аьркинссар, щуркIал хъанай бикIан аьркинссар ватандалий цахва ялугьлай бушиву, – куну.
Казбеклущал ва хьунабакьаврийн бувкIун бия ванал кулпат Фатимагу. Ва бур Гъуниннал райондалиясса. Вайннал дянив ур 2 чIивитIу.
– Казбеклущал ташу бувну махъ жу тачIав куннащал кув укун хъунмасса хIаллай личIи хьуну бакъару. Казбек ттул оьрмугур, ттул дакIгур, чул бищай ттарцIгур, ва чIарав акъа ттун хъинну захIматну бур. Бунугу, ттун хъунмасса пахру бур ттула ласная. Хъанай бивкIссания, гьарцагу хъамитайпалул кунма, нагу дяъви хьун къабитавияв, мугьлат бакъа лещан давияв дяъвилул цIу. Шайссаксса ччяни дучIаннав аьрщарайн паракьатшиву, – тIий бур Фатима.

Хъунама лейтенант Бутта Кьур­банов увну ур 1998-ку шинал УзбакIнаву КIундиннал шяравасса Аьлил ва Дианал кулпатраву. 2000-ку шинал вайннал кулпат бивзун бур КIундив, Бу­ттагу буттал шяравува лавгун ур школалийн. Цаппарасса шиннардивун вайннал кулпат бивзун бур МахIачкъалалив, Шамхал-Термен поселокрайн. Буттал гихуннайсса дуккавугу хьуну дур ва поселокрайсса 44-мур школалий. Ххуйну дуклакаврищал архIал оьрчI хьхьичIунну спортрахунгу агьну ивкIун ур. 2015-ку шинал школагу къуртал бувну, ЕГЭ дуллуну, Бутта увххун ур Смоленск шагьрулийсса Аьра­луннал Противовоздушный Обороналул Аьралий академиялувун. Шиккусса дуккаву щаллу шайхту, 2020-ку шинал тIайла увккун ур Забайкальский крайрайн (ш.Чита), дивизиондалул разведкалул начальникну. 2022-ку шинал мартрай Бутта личIисса дивизиондалуву лавгун ур СВО-райн, лайкь хьуну ур «За боевые отличия» медальданун. Бутта ларгсса шинал гъинттулгу увкIун уссия отпускрай. Ва ххуллухьмур отпуск хъанай дур кIилчинмур.
Буттал нину ва ппу, Аьлил ва Диана, цIанасса чIумал ялапар хъанай бур Санкт-Петербурглив. Аьлил зий ур муххал усттарну, Диана – оьрчIал багъраву тарбиячину.
Бутта цIана ур командный пунктрал начальникну, тийх ва учIаннин ссавур дакъа ялугьлай бур ванал аьралий дустал, ванал каялувшиндаралу зузими. Аьмну ва тагьардания, махъунай ачин ччи-къаччишиврия цIувххукун, Бутта тIий ур:
– Щак-щук тIисса, щин аьркинну, циван дуллалисса давур ва тIисса пикри бакъар аьралитураву. Талатиминнан цинявннан бувчIлай бур ва чара бакъа дуван аьркинсса даву душиву. Укунсса иш хьунунияр къавхьуна хъина, хьуну махърив ва даву бакIуйн дуккан дуван аьркинссар. Ттул ур ттуяра чIивисса уссу, махъ бур ссурахъал, ттун къачча ва тагьаруннил асар вайннайн бивну, муниятугу ччай бур дайдирхьумур къуртал дуван, – тIий ур Бутта.
Ккарччал техникну зузисса чIивима уссицIун, Бутта ххувшаврищал шавайн зана хьуннин ялугьлай бур 2-мур классравун заназисса ванал ссугу.
Аьралитуращалсса хьунабакьаврий хьуна ва журалул давуртту чара бакъа аьркиншивриясса ихтилатгу. Геннадий Кьурбановлул дакIнийн дуртуна ванияр дачIи шинал хьхьичIра шяраву хьусса дуклаки оьрчIал ва СВО-рал гьурттучитурал хьунабакьавугу.

Ва ххуллухьсса хьунабакьаврия махъ аьралитурайн нахIусса гьанттайнссаннуйн цалва дуссукъатлийн оьвкуна КIундиннал шяраваллил заргалтурал. Ши­ккува кIицI лаган, вай мудангу гьурттуну буссар шяраву ва шагьрулий дуллалисса жяматийсса гьарцагу давривух.
Яраппий, Я Аллагь, ччяни лещаннав дяъвилул цIу, аьрайми цIуллуну-сагъну зана хьуннав цалва-цалва кулпатирттавун.