[dropcap]М[/dropcap]ай зурул 31-нний «Дагестан» РИА-лул редакциялий «Открытая власть» проектрал лагрулийсса ирглийсса пресс-конференция хьунни ДР-лул Жилищный инспекциялул каялувчи Сергей Касьяновлущал. Шикку ххал бивгьунни чIяру зивурду дусса къатрал хIаллихшиннарду дузал дуллалисса компаниярттал лицензияртту ласаврил масъалартту.
«ХIакьинусса кьини Дагъусттаннай вай компаниярттан реестрду булайсса сияхIрай бур хIаллихшиннарду дузал дуллалисса 170 идара. Миннува 117 идаралул уттигу булун бувар лицензиярттал чIун лахъи дансса документру. Ва сияхIрава тIурча, так 65 компаниялул буллуну бур лицензияртту цIу дуккан дансса документру. Вайннавагу так 56 компаниялул документру кьамул бувну бур ПаччахIлугърал жилищный инспекциялул. МуницIун бавхIуну, июнь зурул 1-нния тийннай, дахханашивуртту хьун най дур лицензияртту дулаврил реестрдануву. Лицензияртту ласунсса документру къабуллусса компанияртту дуккан дантIиссар реестрдал сияхIрава», – увкунни Дагъусттаннал региондалул жилищный инспекциялул каялувчинал.
Масалдаран, УнцIукIуллал райондалий июнь зурул 1-нния тийнмай сайки 40-хъул къатри дусса ца управляющий компаниялуцIа хьун тIий бур.
Касьяновлул бусаврийн бувну, лицензияртту зерххусса компаниярттал давуртту дацIан дурсса хIаллай къатрал хIаллихшиннарду дузал даврий каялувшиву дуллантIиссар бигарду чIумуйнусса бакIрайн лавсъсса администрацияртту.
Ахирданий, Касьяновлул жавабру дуллунни журналистътурал суаллахьхьун.
