[dropcap]М[/dropcap]ай зурул ахирданий Дагъусттаннай «Бургъил зума» тIисса оьрчIансса лагерьданий хьусса Дунияллул халкьуннал дянивсса жагьилтурал динийсса форум ци даражалий лавгссарив бувсунни журналистътурахь «Дагестан» РИА-лий Миллатрал политикалул ва диннал иширттал министерствалул отделданул хъунама Заур Уруджевлул ва Муфтиятрал просвещениялул отделданул хъунаманал хъиривчу Умар Абакаровлул.
Вайннал бувсунни ва форумрал лагрулий Москавлиясса, Свердловскаллал улклуясса, Санкт-Петербурграясса, Ашттарханнаясса, Луганскаллал Халкьуннал Республикалиясса студентътал спикертурал лекциярттах вичIи дирхьуну бивкIшиву ва гьашину форум онлайн-кьяйдалий най бивкIшиву.
«ЛичIи-личIисса диннал вакилтал цачIун бавтIун, дакIру ца дурну, агьамсса масъалартту ххал бигьлагьисса укунсса форумру анжагъ Дагъусттаннайри шайсса, ва уникальныйсса форумри», – увкунни Уруджевлул. Умар Абакаровлул кIицI лавгунни, форумрал ца гьанумур мурад бушиву агьалинан динная бусу-укурдал журалийсса дурчIала къадикIаншиврул, экспертътурал аьщуйн щусса ихтилатирттал мяъна лаласаву.
«Форумрай экспертътурал аьч бунни дунияллий хъанахъисса иширттал хIакъиравусса бусурманнал, ххачпараснал, буддистътурал ва ягьудинал тарапру, кувннан кув къабувчIавуртту дакъая, ялунгума дия кувннан кув бувчIин ччишиву, интерес», – увкунни ванал.
Форумрай гьуртту хьуми бивну бур Нарын-Къалалийнгу, хьунабавкьуну бур республикалул вузирттал студентътуращал, форум най бивкIсса лагерьданий тиккува бувгьуну бур мурхьругу.
